نئی دہلی، 25 فروری (یو این آئی) کانگریس کے سابق صدر اور لوک سبھا میں اپوزیشن لیڈر راہل گاندھی نے کہا ہے کہ نفرت پھیلانے والوں سے ڈرنے کے بجائے ہم آہنگی کا ماحول قائم  رکھتے ہوئے ہمت دکھا کر  حب الوطنی کا ثبوت دینا  چاہئے۔
کوٹ دوار، اتراکھنڈ سے محمد دیپک کے ساتھ لی گئی ایک تصویر کو شیئر کرتے ہوئے، جن سے وہ دو دن پہلے ملے تھے، مسٹر گاندھی نے کہا کہ ہم آہنگی اور محبت کا نظریہ ان گنت ہم وطنوں میں موجود ہے، لیکن ان کے دلوں میں خوف ہوتا ہے اور دیپک جیسے نوجوان انہیں ہمت کا راستہ دکھاتے ہیں۔ انہوں نے کہا کہ معاشرے میں نفرت پھیلانے والوں سے ڈرنا نہیں چاہیے بلکہ حوصلے سے کھڑے ہونے کی ضرورت ہے۔ یہ سب سے بڑی دیش بھکتی ہے۔
انہوں نے بدھ کو سوشل میڈیا پر لکھا، "کروڑوں ہندوستانیوں کے دلوں میں ہم آہنگی اور محبت کا نظریہ ہے، لیکن ان کے دلوں میں خوف بھی ہے۔ دیپک نے اپنی ہمت سے انہیں  راستہ دکھایا ہے۔ جو لوگ نفرت پھیلا کر سماج کو خوفزدہ کرنے کی کوشش کرتے ہیں وہ دراصل بزدل ہوتے ہیں۔ ان سے کبھی خوفزدہ نہ ہوں"۔ 
مسٹر گاندھی نے ایک بار پھر دیپک کی ہمت کی تعریف کی اور کہا، "دیپک نے ہمارے ترنگے اور آئین کی حفاظت کی ہے۔ وہ نفرت کے سامنے ڈٹے رہے اور کمزوروں کی حفاظت کی- اس سے بڑی حب الوطنی اور کوئی نہیں ہے۔"
اتراکھنڈ سے تعلق رکھنے والا یہ دیپک اس وقت سرخیوں میں آیا تھا جب اس نے ایک مسلم بزرگ کی دکان کے نام سے لفظ "بابا" ہٹانے کے حوالے سے  ہندو تنظیموں کے احتجاج کی مخالفت کی تھی۔ جب دیپک سے اس کا نام پوچھا گیا تو اس نے اپنا نام محمد دیپک بتایا۔ واقعہ کی چرچا ہونے کے بعد مسٹر گاندھی نے دیپک کو فون کیا اور انہیں 10 جن پتھ پر ملنے کی دعوت دی تھی۔