مہاراشٹر کے آنجہانی نائب وزیراعلیٰ اجیت پوار کے طیارہ حادثے کے بارے میں جمعرات کو تازہ پیش رفت سامنےآئی ہے۔ حادثے کا شکار ہونے والے طیارے کے بلیک باکس سے معلومات حاصل کرنے کا عمل سرکاری طور سے شروع کردیا گیا ہے۔ متعلقہ ایجنسیاں پورے معاملے کی سنجیدگی سے تحقیقات کر رہی ہیں اور بلیک باکس سے حاصل ہونے والے ڈیٹا کو انتہائی اہم قرار دیا جا رہا ہے۔

معلومات کے مطابق بلیک باکس سے اہم تکنیکی ڈیٹا اور پرواز سے متعلق ریکارڈ کو نکالنے کی کوششیں جاری ہیں جو حادثے کی وجہ کو سمجھنے میں اہم ثابت ہوں گی۔ بتایا جاتا ہے کہ بلیک باکس میں طیارے کی آحری سرگرمیاں، تکنیکی حالت، پائلٹ اور ایئر ٹریفک کنٹرول کے درمیان ہوئی بات چیت سمیت متعدد اہم معلومات موجود ہوتی ہیں۔ انہیں معلومات کے تجزیے کیا بنیاد پر یہ واضح ہوسکے گا کہ حادثہ تکنیکی خرابی کی وجہ سے ہوا یا کوئی اور وجہ تھی۔
ڈیٹا حاصل کرنے کا عمل مکمل ہونے کے بعد ڈائریکٹوریٹ جنرل آف سول ایوی ایشن (ڈی جی سی اے) کی طرف سے ایک تفصیلی رپورٹ جاری کی جائے گی۔ اس رپورٹ میں حادثے کے اسباب، واردات اور حادثے کی وجوہات سے متعلق واضح معلومات سامنے آنے کی امید ہے۔
بتادیں کہ اس ہولناک حادثے کے حوالے سے مختلف حلقوں سے شکوک وشبہات کا اظہار کئے جانے کے بعد مہاراشٹر کے وزیر اعلیٰ دیویندر فڑنویس نے مرکزی وزیر رام موہن نائیڈو کو خط لکھ کر حادثے کی اصل وجوہات کی مکمل اور غیر جانبدارانہ تحقیقات کا مطالبہ کیا تھا۔ خط میں مستقبل میں ایسے واقعات کی روک تھام کے لیے فوری اور موثر اقدامات پر زور دیا گیا ہے۔
اس حادثے میں سینئر لیڈر اجیت پوار سمیت 5 لوگوں کی جان چلی گئی تھی جس کے بعد ریاستی حکومت نے مرکزی حکومت سے واضح معلومات اور کارروائی کی اپیل کی تھی۔ اس کے جواب میں مرکزی وزیر نے کہا تھا کہ مرکزی حکومت اس معاملے کو بہت سنجیدگی سے لے رہی ہے اور تحقیقات کے نتائج کی بنیاد پر حفاظتی معیار کو مزید مضبوط کرے گی۔ مہاراشٹر حکومت نے بھی تحقیقات میں مکمل تعاون کا وعدہ کیا ہے۔