نئی دہلی، 18 فروری (یو این آئی) اے آئی امپیکٹ سمٹ میں شرکت کے لیے آنے والے گوگل کے سی ای او سندر پچائی نے بدھ کے روز یہاں وزیر اعظم نریندر مودی سے ملاقات کی۔ سوشل میڈیا پلیٹ فارم پر ایکس ایک پوسٹ میں، مسٹر نریندر مودی نے کہا، "دہلی میں اے آئی امپیکٹ سمٹ کے موقع پر سندر پچائی سے مل کر خوشی ہوئی، ہم نے ہندوستان میں مصنوعی ذہانت کے شعبے میں ہونے والے کاموں اور گوگل اس شعبے میں ہمارے ہونہار طلبہ اور پیشہ ور افراد کے ساتھ کیسے کام کر سکتا ہے، ان سب کے بارے میں بات کی۔" 
اس سے قبل، آج صبح یہاں پہنچنے پر مسٹر پچائی نے کہا کہ وہ یہاں اے آئی امپیکٹ سمٹ میں شرکت کے لیے آئے ہیں اور 20 فروری کو کلیدی خطاب کریں گے۔ 
مسٹر سندر پچائی نے سوشل میڈیا پر پوسٹ میں کہا کہ انڈیا اے آئی امپیکٹ سمٹ کے لیے ہندوستان آنا اچھا لگا۔ انہوں نے پرتپاک استقبال کے لیے منتظمین کا شکریہ ادا کیا۔ یہ چوٹی کانفرنس 16 سے 20 فروری تک بھارت منڈپم میں منعقد ہو رہی ہے اور اس کا افتتاح وزیر اعظم نریندر مودی نے کیا تھا۔ 
مسٹر پچائی کا خطاب 20 فروری کی صبح مقرر ہے۔ 
اس سمٹ میں تقریباً 20 سربراہان مملکت اور حکومت سمیت 100 سے زائد ممالک کے مندوبین شرکت کر رہے ہیں۔ ان میں فرانس کے صدر ایمانوئل میکرون، ہسپانوی وزیر اعظم پیڈرو سانچیز، برازیل کے صدر لوئس اناسیو لولا دا سلوا، یونانی وزیر اعظم کیریاکوس اور ابوظہبی کے ولی عہد شہزادہ خالد بن محمد بن زاید النہیان شامل ہیں۔