نئی دہلی، 6 فروری (یواین آئی) دہلی کی وزیرِاعلیٰ ریکھا گپتا نے آج کہا کہ دہلی یونیفائیڈ میٹروپولیٹن ٹرانسپورٹ اتھارٹی (ڈی یو ایم ٹی اے) عوامی نقل و حمل کو مضبوط بنانے، آخری پوائنٹ  تک رابطہ سہولت بہتر کرنے اور نجی گاڑیوں پر انحصار کم کرنے میں اہم کردار ادا کرے گی، جس سے سڑکوں پر ٹریفک جام میں کمی آئے گی۔
دہلی حکومت نے دہلی یونیفائیڈ میٹروپولیٹن ٹرانسپورٹ اتھارٹی (ڈی یو ایم ٹی اے) اور ایک وقف دہلی اربن ٹرانسپورٹ فنڈ (ڈی یو ٹی اے ایف) کے قیام کے لیے ایک جامع بل کا مسودہ تیار کرنے کا عمل شروع کر دیا ہے۔ مجوزہ قانون کا مقصد دہلی کے موجودہ منتشر ٹرانسپورٹ نظام کو ایک مربوط، منظم اور ہم آہنگ منصوبہ بندی و حکمرانی کے ڈھانچے کے تحت لانا ہے تاکہ راجدھانی کے لیے ایک جدید، مؤثر، عوام پر مرکوز اور ماحول دوست پائیدار ٹرانسپورٹ نظام تیار کیا جا سکے۔ یہ پہل دہلی کے شہری ٹرانسپورٹ نظام میں ایک اہم ادارہ جاتی اصلاح کی سمت ایک سنگِ میل ثابت ہوگی۔
مجوزہ قانون کے بروقت اور جامع مسودے کو یقینی بنانے کے لیے وزیرِاعلیٰ نے چیف سیکریٹری کی سربراہی میں ایک اعلیٰ سطحی ٹاسک فورس تشکیل دی ہے۔ ٹاسک فورس کو ہدایت دی گئی ہے کہ وہ مقررہ مدت میں بل کا مسودہ تیار کر کے پیش کرے، جس سے حکومت کی اصلاحاتی وابستگی اور تیاری  ظاہر ہوتی ہے۔ 
انہوں نے کہا، "ڈی یو ایم ٹی اے دہلی کے مکمل شہری نقل و حرکت نظام میں ہم آہنگی قائم کرے گا۔ میٹرو، بس، علاقائی ریل، ریلوے اور فیڈر سروسز جیسے تمام ذرائع نقل و حمل کو ایک مربوط منصوبہ بندی کے دائرہ کار میں لا کر ہم یہ یقینی بنائیں گے کہ ٹرانسپورٹ حل مؤثر، جامع اور عوام پر مرکوز ہوں۔"
وزیرِاعلیٰ نے کہا کہ ڈی یو ایم ٹی اے عوامی نقل و حمل کو مضبوط بنانے، آخری پوائنٹ  تک رابطہ بہتر کرنے اور نجی گاڑیوں پر انحصار کم کرنے میں اہم کردار ادا کرے گا، جس سے سڑکوں پر ٹریفک جام کم ہوگا۔ انہوں نے زور دیا کہ یہ پہل فضائی آلودگی سے نمٹنے کی حکومت کی طویل مدتی حکمتِ عملی کا ایک اہم حصہ ہے۔ گاڑیوں کا دھواں آلودگی کا ایک بڑا مقامی ذریعہ ہے اور منظم و قابلِ اعتماد عوامی ٹرانسپورٹ نیٹ ورک کی توسیع ماحولیاتی اہداف کے حصول کے لیے ضروری ہے۔
انہوں نے کہا، "ہماری حکومت آلودگی سے نمٹنے کے لیے قلیل مدتی، درمیانی مدتی اور طویل مدتی حل پر بیک وقت کام کر رہی ہے۔ گزشتہ برسوں میں بنیادی اصلاحات کے فقدان کے باعث یہ مسئلہ مزید سنگین ہوا ہے۔ ڈی یو ایم ٹی اے کا قیام نجی گاڑیوں پر انحصار کم کرنے اور دہلی کے ہر شہری کو صاف، محفوظ اور مؤثر نقل و حرکت فراہم کرنے کے لیے ایک اہم طویل مدتی قدم ہوگا۔"
قومی شہری ٹرانسپورٹ پالیسی کے تحت بڑے شہروں میں ایک مربوط میٹروپولیٹن ٹرانسپورٹ اتھارٹی (یو ایم ٹی اے) کا تصور پیش کیا گیا ہے تاکہ شہری ٹرانسپورٹ کی حکمتِ عملی اور مربوط عمل درآمد کو یقینی بنایا جا سکے۔ دہلی این سی آر میں بڑھتی آبادی، آلودگی، سڑکوں پر دباؤ اور منظم عوامی ٹرانسپورٹ کی بڑھتی ضرورت ڈی یو ایم ٹی اے کے قیام کو نہایت ضروری بناتی ہے۔