تل ابیب، 29 جنوری (یو این آئی) اسرائیلی وزیر اعظم بن یامین نیتن یاہو نے حماس کے ہتھیار ڈالنے تک غزہ کا کنٹرول چھوڑنے سے انکار کردیا ہے۔ 
بین الاقوامی خبر رساں ادارے کی رپورٹ کے مطابق نیتن یاہو نے غزہ کے مستقبل سے متعلق اپنا منصوبہ پیش کرتے ہوئے کہا ہے کہ اسرائیلی فوج دریائے اردن سے بحیرہ روم تک پورے علاقے پر سیکیورٹی کنٹرول کو برقرار رکھے گی، جس میں غزہ بھی شامل ہوگا۔ 
ہزاروں مظلوم فلسطینیوں کے قاتل اسرائیلی وزیر اعظم کا کہنا تھا کہ غزہ کی تعمیر نو سے قبل حماس کو مکمل طور پر غیر مسلح کرنا ناگزیر ہے۔ جس میں سرنگوں سمیت اس کے پورے عسکری ڈھانچے کا خاتمہ شامل ہے۔ 
انہوں نے کہا کہ مصر سے ملحق رفح کراسنگ جلد دونوں جانب کے لیے کھولی جائے گی۔ لیکن اس راستے سے صرف افراد کی آمدورفت کی اجازت ہو گی، سامان کی ترسیل کی اجازت نہیں دی جائے گی۔ 
اسرائیلی وزیر اعظم نے واضح کیا کہ کسی شخص کو غزہ چھوڑنے سے روکا نہیں جائے گا۔ تاہم انہوں نے کہا کہ خودمختار اور علیحدہ فلسطینی ریاست کے قیام کی اجازت نہیں دی جائے گی۔
یو این آئی۔ ع ا۔