شیئر بازار میں تیزی برقرار، سینسیکس میں 828 پوائنٹس اضافہ
ممبئی، 10 جولائی (یو این آئی) گھریلو شیئر بازاروں میں جمعہ کو مسلسل دوسرے روز بھی تیزی کا رجحان برقرار رہا اور بی ایس ای کا سینسیکس 827.57 پوائنٹس یعنی 1.08 فیصد اضافے کے ساتھ 77,569.39 پوائنٹس پر بند ہوا۔
نیشنل اسٹاک ایکسچینج کا نفٹی-50 انڈیکس بھی 244.10 پوائنٹس یعنی 1.02 فیصد بڑھ کر 24,206.90 پوائنٹس پر بند ہوا۔ آج بازار میں ہر طرف خریداری کا رجحان دیکھا گیا۔ درمیانی درجے کی کمپنیوں کے نفٹی مڈ کیپ-50 انڈیکس میں 1.20 فیصد جبکہ اسمال کیپ-100 انڈیکس میں 1.55 فیصد کا اضافہ ریکارڈ کیا گیا۔ ایف ایم سی جی شعبے کے علاوہ تمام سیکٹروں میں تیزی رہی۔ آئی ٹی، بینکنگ، مالیاتی خدمات، رئیل اسٹیٹ، دھات، تیل و گیس، کیمیکل اور پائیدار صارفین کی مصنوعات سے متعلق اشاریوں میں نمایاں اضافہ درج کیا گیا۔
سینسیکس میں شامل کمپنیوں میں ریلائنس انڈسٹریز، بی ای ایل اور ٹیک مہندرا کے حصص میں دو فیصد سے زیادہ اضافہ ہوا۔ ایکسس بینک، ٹاٹا اسٹیل، انفوسس، بجاج فائنانس، الٹرا ٹیک سیمنٹ، اڈانی پورٹس، ایل اینڈ ٹی، ایچ سی ایل ٹیکنالوجیز، آئی سی آئی سی آئی بینک، اسٹیٹ بینک آف انڈیا، انڈیگو، مہندرا اینڈ مہندرا، بجاج فنسرو اور ٹی سی ایس کے حصص ایک سے دو فیصد تک مضبوط ہوئے۔ ماروتی سوزوکی، ایچ ڈی ایف سی بینک، پاور گرڈ، ٹائٹن اور این ٹی پی سی کے حصص میں بھی اضافہ دیکھا گیا۔
دوسری جانب ایٹرنل، بھارتی ایئرٹیل اور سن فارما کے حصص میں گراوٹ درج کی گئی۔
