لکھنؤ، 8 اپریل (یو این آئی) سماج وادی پارٹی (ایس پی) کے قومی صدر اکھلیش یادو نے بھارتیہ جنتا پارٹی (بی جے پی) اور اس کے اتحادیوں پر سخت حملہ کرتے ہوئے الزام لگایا ہے کہ ان کی پالیسیاں سماج میں تقسیم اور خوف کا ماحول پیدا کر رہی ہیں۔
مسٹر یادو نے بدھ کو کہا کہ یہ لوگ 'تقسیم کرو اور راج کرو' کے اصول پر کام کر رہے ہیں اور ملک کے لوگوں کو آپس میں لڑانے کی کوشش کر رہے ہیں۔ انہوں نے سوشل میڈیا پر ایک پوسٹ میں کہا کہ کچھ تنظیمیں اپنی شناخت چھپا کر معاشرے میں سرگرم ہیں اور لوگوں میں دراڑ پیدا کرنے کا کام کر رہی ہیں۔ ایسے عناصر کو "ان رجسٹرڈ گینگ" قرار دیتے ہوئے انہوں نے الزام لگایا کہ یہ معاشرے میں عدم استحکام پھیلا کر عوام کی توجہ اصل مسائل سے ہٹانا چاہتے ہیں۔ 
ایس پی سربراہ نے کہا کہ عام لوگ امن اور ہم آہنگی کے خواہاں ہیں لیکن کچھ خود غرض افراد معاشرے میں خوف اور بداعتمادی کا ماحول بنا کر اپنے سیاسی مفادات حاصل کر رہے ہیں۔ انہوں نے الزام لگایا کہ ایسے افراد معصوم لوگوں کو بہکا کر  تشدد اور کشیدگی کے حالات پیدا کرتے ہیں۔
مسٹر یادو نے دعویٰ کیا کہ عوام اب ان حقائق کو سمجھ رہے ہیں اور ایسے لوگوں کو اپنے درمیان جگہ نہیں دے رہے ہیں۔ انہوں نے یقین ظاہر کیا کہ مستقبل میں عوام ان پالیسیوں کو یکسر مسترد کر دیں گے اور ملک میں مثبت تبدیلی آئے گی۔ انہوں نے کہا کہ عوام کی بیداری ہی ملک کا مستقبل طے کرے گی اور اب "برے دن" ختم ہو نے والے ہیں۔