لکھنؤ، 16 مارچ (یواین آئی) سماج وادی پارٹی (ایس پی) کے صدر اکھلیش یادو نے گیس سلنڈر بحران کو لے کر صوبائی حکومت اور بھارتیہ جنتا پارٹی پر سخت حملہ کیا ہے۔ انہوں نے کہا کہ سلنڈر کے لیے لمبی قطاروں میں کھڑے لوگوں کی پریشانی صاف دکھائی دے رہی ہے، اس کے باوجود بی جے پی یہ دعویٰ کر رہی ہے کہ گیس کی کوئی کمی نہیں ہے۔  
پیر کو سوشل میڈیا کے ذریعے اکھلیش یادو نے کہا کہ پریشان حال خاندانوں اور بلکتے بچوں کی حالت دیکھ کر بھی اگر حکومت حساس نہیں ہو رہی ہے، تو یہ انتہائی بدقسمتی ہے۔ انہوں نے الزام لگایا کہ عوام کی تکلیف کو نظرانداز کر بی جے پی جھوٹ بول رہی ہے اور زمینی حقیقت سے منہ موڑ رہی ہے۔  
انہوں نے کہا کہ عام لوگ سلنڈر حاصل کرنے کے لیے گھنٹوں قطار میں کھڑے رہنے پر مجبور ہیں۔ کئی خاندانوں کو کھانا بنانے تک میں دشواری ہو رہی ہے۔ اس کے باوجود حکومت یہ کہہ رہی ہے کہ کہیں بھی گیس کی کمی نہیں ہے۔  
ایس پی صدر نے کہا کہ عوام اب سمجھ نہیں پا رہی ہے کہ ان کی مشکلات دیکھ کر بھی بی جے پی کے رہنما اتنی بے شرمی سے انکار کیسے کر رہے ہیں۔ انہوں نے کہا کہ بھوک سے پریشان خاندان اب یہ کہنے لگے ہیں کہ بی جے پی رہنماؤں کے دل پتھر کے نہیں بلکہ ان کے پاس دل ہی نہیں ہے۔ اکھلیش یادو نے حکومت سے گیس سپلائی کی صورتحال واضح کرنے اور عام لوگوں کو راحت دینے کا مطالبہ کیا ہے۔