نئی دہلی، 27 ستمبر (یو این آئی) نائب صدر جمہوریہ جگدیپ دھنکھڑ نے ناری شکتی وندن ایکٹ کو ایک "گیم چینجر" قرار دیتے ہوئے بدھ کو کہا کہ جب تک 50 فیصد انسانیت کے لیے انصاف کو یقینی نہیں بنایا جائے گا، معاشرہ ترقی نہیں کر سکتا۔
مسٹر دھنکھڑ نے آج راجستھان میں برلا انسٹی ٹیوٹ آف ٹیکنالوجی اینڈ سائنس (بی آئی ٹی ایس) پلانی کے طلباء اور فیکلٹی ممبران سے خطاب کرتے ہوئے یہ بات کہی۔ انہوں نے خواتین کو اسمبلیوں اور لوک سبھا میں ایک تہائی ریزرویشن دینے کے بل کا حوالہ دیتے ہوئے کہا کہ یہ خواتین کے حقوق کی پہچان اور ان کے حقوق کی تصدیق ہے۔
مسٹر دھنکھڑ نے عام لوگوں کی زندگیوں کو بہتر بنانے کے لیے تعلیم کو سب سے مؤثر اور کارآمد ذریعہ بتایا اور کہا کہ اس سے ہندوستان کی ترقی میں تیزی آئے گی۔ انہوں نے کہا کہ جمہوری عمل میں احتساب اور شہری  شراکت کی اہمیت کو مضبوط کرتے ہوئے ہر شہری کو پارلیمنٹ میں پٹیشن پیش کرنے کا حق ہے۔
انہوں نے کہا کہ جی-20  رکن کے طور پر افریقی یونین کی شمولیت ہندوستان کے تہذیبی اخلاق کے ساتھ گہرائی سے ہم آہنگ ہے۔ ہندوستان-مشرق وسطی-یورپ اقتصادی راہداری (آئی ایم ای سی) پر دستخط کو عالمی 'گیم چینجر' قرار دیتے ہوئے نائب صدر نے کہا کہ ہندوستان کے کردار نے 'گلوبل ساؤتھ' کو عالمی سطح پر ایک مضبوط آواز دی ہے۔
بدعنوانی کو 'جمہوریت اور ترقی کا قاتل' قرار دیتے ہوئے نائب صدر جمہوریہ نے کہا کہ حالیہ برسوں میں طاقت کے دلالوں کے اثر و رسوخ والے اقتدار کی راہداری کو بے اثر کرنے میں اہم پیش رفت ہوئی ہے۔ کوئی بھی شخص قانون سے بالاتر نہیں۔ انہوں نے لوگوں پر زور دیا کہ وہ ہندوستان مخالف بیانات کا فعال طور پر مقابلہ کریں جو ہندوستانی اداروں کو داغدار، بدنام اور کمزور کرتے ہیں۔