بہار میں گنڈک ندی کے دباؤ کے باعث چمپارن کا پشتہ ٹوٹ گیا ہے۔ منگل (29 ستمبر) کی صبح محکمہ آبی وسائل کی جانب سے اطلاع دی گئی کہ پیر کی رات مغربی چمپارن میں گنڈک ندی کے بائیں کنارے پر تعمیر شدہ چمپارن پشتہ کو 2 جگہوں (گاؤں خیرتوا، بلاک بگہا اور گاؤں پھولیا کھاڑ، بلاک بیریا) پر نقصان پہنچا ہے۔ اس کے علاوہ اترپردیش میں کشی نگر میں گنڈک ندی کے دائیں کنارے پر تعمیر شدہ پشتہ کو بھی ایک جگہ پر نقصان پہنچا ہے۔ بہار میں محکمہ آبی وسائل اور مغربی چمپارن ضلع انتظامیہ کی ٹیم کی جانب سے ضروری اقدامات کیے گئے ہیں۔

واضح رہے کہ گنڈک ندی کے پانی کو روکے رکھنے کے لیے یہ پشتہ بنایا گیا تھا۔ پیر کو یہ پانی کا شدید دباؤ برداشت نہیں کر پایا اور ٹوٹ گیا۔ رات تقریباً 10 بجے پشتہ ٹوٹا ہے، جس کی وجہ سے کئی علاقوں میں پانی داخل ہو گیا ہے۔ پیر کو گنڈک بیراج سے 543500 کیوسک پانی کا اخراج ہوا ہے جو ابھی اپنے زیریں علاقوں مغربی چمپارن، مشرقی چمپارن، گوپال گنج، سارن، مظفرپور اور ویشالی سے ہو کر گزر رہا ہے۔ اس دوران والمیکی نگر واقع گنڈک بیراج پر ندی میں پانی کا بہاؤ 13 گھنٹے تک 5 لاکھ کیوسک سے زائد اور 32 گھنٹے تک 4 لاکھ کیوسک سے زیادہ بنا رہا۔
قابل ذکر ہے کہ 26 اور 27 ستمبر کے درمیان بہار میں گنڈک ندی سے متصل سرحدی اضلاع میں بھی کافی زیادہ بارش ہوئی ہے۔ اس کی وجہ سے پانی کی سطح پہلی سے ہی بڑھی ہوئی ہے۔ گنڈک ندی میں پانی کے انتہائی زیادہ بہاؤ کے نتیجے میں ندی پر تعمیر شدہ پشتوں پر شدید دباؤ کی صورتحال بنی ہوئی ہے۔ محکمہ آبی وسائل کی جانب سے بتایا گیا کہ علاقائی انجینئر مسلسل سیلاب سے نمٹنے کے کام میں مصروف ہیں۔ پشتوں پر کافی دباؤ ہے۔ صورتحال کی سنگینی کو دیکھتے ہوئے ہیڈکوراٹر سے رات میں ہی ایگزیکٹو انجینئر کی سربراہی میں 4 ٹیموں کو بگہا، بیتیا، موتیہاری اور گوپال گنج بھیجا گیا ہے۔ غیر متوقع پانی کے اخراج کو دیکھتے ہوئے پہلے سے ہی اضافی انجینئروں کو موقع پر تعینات کیا گیا ہے۔ بالائی علاقوں میں پانی کی سطح کم ہونے جبکہ زیریں علاقوں میں بڑھنے کا رجحان ہے۔ اعلیٰ افسران کی جانب سے مسلسل نگرانی کی جا رہی ہے۔