سعودی عرب نے حج بیت اللہ 2027 کے حوالے سے تیاریاں تیز کر دی ہیں۔ اس دوران سعودی عرب کی وزارت حج و عمرہ نے غیر ملکی زائرین کے لیے ایک جامع سروس پیکیج کا اعلان کیا ہے۔ اس کے تحت حج سے متعلق تمام ضروری خدمات کو ایک ہی ’الیکٹرانک معاہدے‘ میں شامل کیا گیا ہے۔ اطلاع کے مطابق یہ پیکیج الیکٹرانک پاتھ پلیٹ فارم کے ذریعے فراہم کیا جائے گا۔ بتایا جا رہا ہے کہ اس میں زائرین کے سعودی عرب پہنچنے سے لے کر ان کی واپسی تک کے ضروری انتظامات شامل ہوں گے۔ اسے زائرین کی ضروریات کو پورا کرنے کے لیے خصوصی طور پر ڈیزائن کیا گیا ہے۔
وزارت حج و عمرہ کے مطابق اس نئے پیکیج میں 4 اہم خدمات کو شامل کیا گیا ہے۔ ان میں مقدس مقامات پر خدمات، مکہ معظمہ اور مدینہ منورہ میں قیام کا انتظام، ٹرانسپورٹ اور کھانے پینے کی سہولیات شامل ہیں۔ اس کے علاوہ زائرین کے لیے کچھ اختیاری اور اضافی خدمات بھی دستیاب کرائی جائیں گی۔ اس انتظام کا مقصد حج بیت اللہ کے لیے آنے والے غیر ملکی زائرین کے سفر کو آسان بنانا ہے۔ زائرین ایک ہی پیکیج میں سفر حج کی تمام بنیادی خدمات حاصل کر سکتے ہیں۔ وزارت نے کہا کہ اس نظام سے غیر ملکی حج امور کے دفاتر اور ایجنسیوں کو ایک واضح اور لچکدار معاہدے کے دائرے میں مختلف زائرین کے گروپوں کے لیے خصوصی پروگرام تیار کرنے میں مدد ملے گی۔
وزارت نے 75 سے زائد ممالک کی نمائندگی کرنے والے حج امور کے دفاتر کے ساتھ میٹنگیں بھی شروع کر دی ہیں۔ ان میٹنگوں میں انتظامات سے متعلق منصوبوں، ضوابط اور ضروری انتظامات کا جائزہ لیا جا رہا ہے۔ یہ پہل سعودی عرب کے وژن 2030 اور ’پلگرم ایکسپیریئنس پروگرام‘ کے مقاصد کے مطابق ہے۔ اس کا مقصد حج اور عمرہ کے لیے آنے والے زائرین کے تجربے کو بہتر بنانا اور پورے عمل کو زیادہ منظم کرنا ہے۔ سعودی عرب نے حالیہ برسوں میں اپنے ڈیجیٹل حج انفراسٹرکچر کو بھی وسعت دی ہے۔ وزارت کے الیکٹرانک پلیٹ فارم زائرین اور سروس پرووائیڈرز کے لیے کنٹریکٹنگ، آپریشنل سرگرمیوں اور ویزا کے عمل کو ایک ہی نظام سے جوڑتے ہیں۔ نئے الیکٹرانک پیکیج کو بھی اسی ڈیجیٹل نظام کا حصہ مانا جا رہا ہے۔
