نئی دہلی، 29 اگست (یو این آئی) وزیرِ دفاع راج ناتھ سنگھ نے طلبہ سے بابا صاحب امبیڈکر کے "تعلیم حاصل کرو، تحریک چلاؤ اور منظم ہوجاؤ" کے منتر کا حوالہ دیتے ہوئے تشدد کے بجائے آئینی اور جمہوری ذرائع سے ناانصافی کے خلاف آواز اٹھانے نیز سماجی اور اقتصادی تبدیلی کو آگے بڑھانے کی اپیل کی ہے۔
مسٹر سنگھ نے ہفتے کے روز لکھنؤ میں واقع بابا صاحب بھیم راؤ امبیڈکر یونیورسٹی کی تقسیمِ اسناد تقریب سے خطاب کرتے ہوئے کہا کہ جب جمہوری راستے دستیاب ہوں، تب امبیڈکر نے تشدد، انارکی اور غیر آئینی طریقوں کے خلاف خبردار کیا تھا اور انہیں "انارکی کی گرامر" بتایا تھا۔ انہوں نے کہا کہ یونیورسٹیوں کو انصاف، مساوات، آزادی اور اخوت کی اقدار کی بنیاد پر نوجوان ذہنوں کو تیار کرنا چاہیے، جبکہ تعلیم میں علم، عملی مہارت، مسئلہ حل کرنے کی صلاحیت، اقدار اور سماجی حساسیت کی شمولیت ہونی چاہیے۔
نوجوانوں سے روزگار پیدا کرنے والے، مسئلہ حل کرنے والے اور تبدیلی کا محرک بننے کا اپیل کرتے ہوئے مسٹر سنگھ نے تیزی سے ہو رہی تکنیکی تبدیلیوں کے درمیان مسلسل سیکھنے اور وقت کے مطابق ڈھلنے پر زور دیا۔ انہوں نے طلبہ سے 2047 تک وکست بھارت کے ہدف کی سمت میں "ٹیم انڈیا" کے حصے کے طور پر کام کرنے کا درخواست کی اور کہا کہ پختہ عزم، لچک اور سخت محنت چیلنجوں کو مواقع میں بدل سکتی ہے۔
وزیرِ دفاع نے آتم نربھر بھارت کی سمت میں گزشتہ ایک دہائی میں حکومت کی کوششوں کو اجاگر کیا، جن میں سیمی کنڈکٹر مینوفیکچرنگ، ڈیجیٹل پبلک انفراسٹرکچر، اسٹارٹ اپس اور مینوفیکچرنگ کا شعبہ شامل ہیں۔ انہوں نے ہندوستان کے خلائی شعبے میں پیشرفت کا بھی ذکر کیا، جس میں انسانی خلائی پرواز اور ہندوستانی خلائی اسٹیشن کے منصوبے نیز نجی خلائی اسٹارٹ اپس کا بڑھتا ہوا کردار شامل ہے۔
تعلیم، تحقیق اور جدت طرازی کے شعبے کا ذکر کرتے ہوئے مسٹر سنگھ نے کہا کہ تحقیق و ترقی پر اخراجات دوگنے ہوئے ہیں، 34 سالوں کے بعد قومی تعلیمی پالیسی لائی گئی ہے اور ہندوستان عالمی انوویشن انڈیکس میں اوپر آیا ہے نیز دنیا کا تیسرا سب سے بڑا اسٹارٹ اپ ایکو سسٹم بن گیا ہے۔
انہوں نے ہندوستان کی ثقافت، تہذیب اور ورثے کو محفوظ رکھنے کی اہمیت پر بھی زور دیا اور کہا کہ وکست بھارت اور آتم نربھر بھارت کے سفر کو صرف اقتصادی ترقی سے نہیں ناپا جا سکتا۔ انہوں نے کہا کہ اپنی تہذیب، ثقافت اور صلاحیت میں ہندوستان کا بڑھتا ہوا اعتماد "میک ان انڈیا" کی کامیابی کے پیچھے ہے۔
