پٹنہ، 06 ستمبر (یواین آئی) بہار کے وزیر اعلی نتیش کمار کی قیادت میں جیویکا کے ذریعے بہار حکومت کی طرف سے لاگو کیا گیا اسٹارٹ اپ ولیج انٹرپرینیورشپ پروگرام (ایس وی ای پی) ریاست کے دیہی خاندانوں کی تقدیر بدل رہا ہے۔ 
یہ اسکیم نہ صرف روزگار کا ایک ذریعہ بنی ہے بلکہ خواتین اور نوجوانوں کو انٹرپرینیورشپ کی طرف ترغیب دے کر انہیں خود انحصار بنانے میں بھی اہم کردار ادا کر رہی ہے۔ اس اسکیم کا بنیادی مقصد دیہی خواتین اور نوجوانوں کو اپنا کاروبار شروع کرنے کی ترغیب دینا ہے۔ اس کے تحت انہیں مالی، تکنیکی اور تربیتی بنیادوں پر مدد فراہم کی جاتی ہے۔ خاص بات یہ ہے کہ ایس وی ای پی میں خواتین کو سیلف ہیلپ گروپس سے جوڑا جاتا ہے، تاکہ وہ منظم ہو کر کاروبار کی باریکیاں جان سکیں۔ کاروباری منصوبے بنانے،حساب و کتاب رکھنے، مارکیٹنگ، کسٹمر سروس اور پروڈکٹ مینجمنٹ جیسے موضوعات پر عملی تربیت دی جاتی ہے۔ 
کاروبار شروع کرنے کے لیے کمیونٹی انٹرپرائز فنڈ کے ذریعے ضمانت کے بغیر قرض کا انتظام کیا گیا ہے۔ یہ قرض جو آسان قسطوں میں ادا کیا جا سکتا ہے، خواتین کے لیے بہت بڑی سہولت ثابت ہو رہا ہے۔ تربیت یافتہ انٹرپرائز ایسوسی ایٹس بھی ان خواتین کاروباریوں کو مسلسل رہنمائی فراہم کرتے ہیں۔ اس سکیم کے ذریعے اب تک تقریباً 32 ہزار خاندانوں کو خود روزگار/کاروباری منصوبوں کے لیے ترغیب دی جا رہی ہے۔ یہ خاندان خود کفیل ہو رہے ہیں اور مقامی سطح پر کاروبار کے مواقع بڑھنے کی وجہ سے نوجوانوں کونقل مکانی کی مجبوری سے بھی نجات مل رہی ہے۔ اس اسکیم نے بہت سی خواتین کی زندگیاں بدل دی ہیں۔ 
بیگوسرائے کی اندو دیدی نے بتایا کہ پہلے اپنے شوہر کی گروسری کی دکان سے خاندان چلانا مشکل تھا۔ ایس وی ای پی میں شامل ہو کر، انہوں نے ہری سبزیوں، بڑی، پاپڑ اور ستو کا کاروبار شروع کیا۔ آج ان کا خاندان خوش ہے۔ اسی طرح برونی بلاک کی انیتا دیدی بھی قرض لے کر کاروبار شروع کر کے بہتر زندگی گزار رہی ہیں۔ ایسی ہزاروں خواتین کی کہانیاں ہیں، جنہیں نتیش حکومت کے اس اقدام سے ایک نئی شناخت اور خود انحصاری ملی ہے۔ دیہی سطح پر خواتین کی انٹرپرینیورشپ کی یہ مثال ریاست کی ترقی میں نئی توانائی ڈال رہی ہے۔