سری نگر،2اگست(یو این آئی) جموں و کشمیر کے لیفٹیننٹ گورنر منوج سنہا نے کہا ہے کہ ’چنار کتاب میلہ‘ علم، تحقیق اور فکری تبادلے کا ایک نمایاں پلیٹ فارم ہے جو قارئین کو نئے خیالات اور نظریات سے روشناس کرانے میں اہم کردار ادا کرے گا۔
لیفٹیننٹ گورنر منوج سنہا نے قومی کتاب ٹرسٹ آف انڈیا (این بی ٹی) کی جانب سے منعقدہ سالانہ ’چنار کتاب میلہ‘ میں شرکت کے دوران کہا کہ یہ میلہ نہ صرف ادب و ثقافت کا جشن ہے بلکہ نوجوان نسل کو ممتاز مصنفین اور دانشوروں کے ساتھ براہ راست مکالمے کا موقع بھی فراہم کرتا ہے۔انہوں نے کہا:’یہ کتاب میلہ قارئین کو نئے خیالات، مکاتبِ فکر اور علمی رجحانات سے جوڑنے کا ذریعہ بنے گا۔ مجھے خوشی ہے کہ نیشنل بُک ٹرسٹ نے اس علمی روایت کو جموں و کشمیر میں فروغ دیا۔‘
منوج سنہا نے اپنے خطاب میں مصنفین سے مطالبہ کیا کہ وہ تاریخ کو نئے سرے سے تحریر کرنے کی جانب توجہ دیں تاکہ وہ حقائق جو ماضی میں مسخ کیے گئے، درست کیے جا سکیں۔ انہوں نے کہا کہ نئی نسل کو یہ جاننا ضروری ہے کہ ہندوستانی تہذیب نہ صرف معاشی اعتبار سے خوشحال تھی بلکہ علم، سائنس، ادب اور روحانیت کا عالمی مرکز بھی تھی۔انہوں نے مزید کہا:’ہماری تہذیب نے صدیوں تک دنیا کو علمی روشنی دی ہے۔ اب وقت آ گیا ہے کہ ہم اپنی نئی نسل کو اس ورثے سے آگاہ کریں تاکہ وہ اپنی شناخت پر فخر محسوس کریں۔‘
لیفٹیننٹ گورنر نے اس بات پر زور دیا کہ جموں و کشمیر میں ایسے فکری و ادبی میلوں کا انعقاد ریاست کی علمی و ثقافتی شناخت کو مضبوط کرے گا اور کتاب دوستی کے رجحان کو فروغ دے گا۔