ہندوستان اور پاکستان کے درمیان بڑھتی ہوئی کشیدگی کے درمیان سوشل میڈیا پر افواہوں اور فیک نیوز کا سیلاب آ گیا ہے۔ ایسے ماحول میں عوامی جذبات کو بھڑکانے اور حالات کو مزید بگاڑنے والی کئی فرضی خبریں تیزی سے پھیل رہی ہیں۔ تاہم، حکومت ہند کی طرف سے قائم کردہ ادارہ ’پی آئی بی‘ فیکٹ چیک کے ذریعے مسلسل سرگرم ہے اور گمراہ کن معلومات کو بے نقاب کر کے عوام کو حقائق سے آگاہ کر رہا ہے۔

حالیہ دنوں میں سوشل میڈیا پلیٹ فارم ‘ایکس’ (سابق ٹوئٹر) پر ایک ویڈیو وائرل ہوئی، جس میں دعویٰ کیا گیا کہ ہندوستانی فوجی پاکستان کے ساتھ بڑھتے تناؤ سے پریشان ہو کر رو رہے ہیں اور اپنی ملازمت چھوڑ رہے ہیں۔ پی آئی بی فیکٹ چیک نے اس ویڈیو کی حقیقت بتاتے ہوئے کہا کہ ویڈیو میں دکھائے گئے نوجوان اصل میں اندور کے ایک نجی کوچنگ سینٹر، اندور فزیکل اکیڈمی کے طالب علم ہیں، جو ہندوستانی فوج میں منتخب ہونے کی خوشی میں جذباتی ہو گئے تھے۔ یہ ویڈیو کسی بھی طرح سے فوجی مایوسی یا نوکری چھوڑنے سے متعلق نہیں۔
ایک اور وائرل ویڈیو میں دعویٰ کیا جا رہا ہے کہ ہندوستانی پوسٹ کو پاکستان نے تباہ کر دیا ہے۔ پی آئی بی نے اس پر وضاحت دیتے ہوئے کہا کہ یہ کوئی پرانی ویڈیو ہے جو 15 نومبر 2020 کو یوٹیوب پر اپلوڈ کی گئی تھی اور موجودہ حالات سے اس کا کوئی تعلق نہیں۔
اسی طرح ایک دعویٰ کیا گیا کہ جموں و کشمیر میں سرینگر ایئرپورٹ کے قریب دھماکے ہوئے ہیں۔ یہ خبر بین الاقوامی میڈیا ادارے الجزیرہ کے حوالے سے شیئر کی گئی لیکن پی آئی بی فیکٹ چیک نے واضح کیا کہ ایسی کوئی بھی تصدیق شدہ اطلاع نہیں ہے۔ عوام سے کہا گیا کہ وہ صرف سرکاری ذرائع پر بھروسہ کریں اور افواہوں سے بچیں۔
ایک اور جھوٹا دعویٰ کیا گیا کہ جے پور ایئرپورٹ پر بھی دھماکے ہوئے ہیں، جسے جے پور کے ڈپٹی کمشنر نے سختی سے مسترد کیا۔ انہوں نے بتایا کہ ایئرپورٹ مکمل طور پر محفوظ ہے اور ایسی خبروں میں کوئی سچائی نہیں ہے۔
مزید برآں، ایک ویڈیو میں ہندوستان پر الزام لگایا گیا کہ اس نے ننکانہ صاحب گردوارے پر ڈرون حملہ کیا ہے۔ پی آئی بی نے اس ویڈیو کو مکمل طور پر فرضی قرار دیا اور کہا کہ اس طرح کی جھوٹی خبروں کے ذریعے فرقہ وارانہ ہم آہنگی کو نقصان پہنچانے کی کوشش کی جا رہی ہے۔
یہاں تک کہ ایک بے بنیاد دعویٰ یہ بھی سامنے آیا کہ پاکستان کے حملے کے باعث ہندوستان کی 70 فیصد الیکٹرک گرڈ بند ہو گئی ہے، یہ بھی فرضی خبر تھی، جس کے بارے میں پی آئی بی فیکٹ چیک کے ذریعے لوگوں کو سچائی سے روشناس کرایا گیا۔
دریں اثنا، پی آئی نےچیک عوام سے اپیل کی ہے کہ وہ ایسی خبروں پر یقین نہ کریں، کسی بھی مواد کو شیئر کرنے سے پہلے اس کی حقیقت جانچیں اور صرف سرکاری ذرائع سے حاصل شدہ معلومات پر انحصار کریں۔ یہ وقت احتیاط، اتحاد اور صبر کا ہے، افواہوں کا نہیں۔