اترپردیش کے سدھارتھ نگر ضلع میں ایک چونکا دینے والا معاملہ سامنے آیا ہے۔ یہاں 7-6 ہزار روپے کمانے والے ایک نوجوان کو محکمہ انکم ٹیکس نے 2 کروڑ روپئے کا نوٹس بھیج دیا ہے۔ اس نوٹس کی وجہ سے متاثرہ شخص کی نیند اڑی ہوئی۔ وہ اب اس سلسلے میں افسران کے چکر لگا رہا ہے۔ ’آج تک‘ کی خبرکے مطابق سدھارتھ نگرکے ڈومریا گنج تحصیل علاقے میں رہنے والے ایک نوجوان کو جی ایس ٹی محکمہ نے تقریباً 2 کروڑ روپے ٹیکس ادا کرنے کا نوٹس بھیجا ہے۔ نوٹس سے حیران وپریشان اوم پرکاش ورما کا کہنا ہے کہ میں ایک غریب آدمی ہوں، 6000 سے7000 روپے کی نوکری کرتا ہوں، مجھے بغیر کسی وجہ کے پھنسایا جا رہا ہے۔
بتایا جاتا ہے کہ ڈومریا گنج تھانہ علاقہ کے بھرواٹھیا مستکہم گاؤں کے رہنے والے اوم پرکاش کو محکمہ جی ایس ٹی سے 1,99,42,313 روپے ٹیکس جمع کرنے کا نوٹس ملا ہے۔ یہ نوٹس 10 فروری کو بذریعہ ڈاک موصول ہوا۔ اوم پرکاش نوٹس پڑھ کر حیران رہ گئے کیونکہ وہ پرائیویٹ ٹیچر ہیں اور6 سے 7 ہزار روپے کماتے ہیں۔ اوم پرکاش نے سب سے پہلے اس معاملے کو لے کر ڈمریا گنج پولیس اسٹیشن میں درخواست دی۔
اس کے بعد ہیڈکوارٹر واقع محکمہ سیلز ٹیکس میں دریافت کیا تو پتا چلا کہ اوم پرکاش کے پین کارڈ کا کسی نے غلط استعمال کرکے نئی دہلی اور فرخ آباد میں الگ الگ کمپنیاں بنائی ہیں۔ ان کمپنیوں کے ذریعہ لین دین کیا گیا ہے۔ نئی دہلی میں واقع اوم ٹریڈرز نے گزشتہ سال 11,07,90,628 روپئے کا لین دین کیا تھا جس کا ٹیکس 1,99,42,313 روپئے جمع کرنے کے لیے متاثرہ کو بذریعہ ڈاک نوٹس ملا ہے۔
متاثرہ نے بتایا کہ میں بھروٹھیا مستکحم، سدھارتھ نگر کا رہنے والا ہوں، میں نے پین کارڈ بنوایا تھا جس کا کسی نے غلط استعمال کرکے دو کمپنیاں بنائی ہیں۔ ایک دہلی میں اوم ٹریڈرز کے نام سے رجسٹرڈ ہے اور دوسری فرخ آباد میں ورما انٹرپرائزز کے نام سے رجسٹرڈ ہے۔ مجھے یہ نوٹس 10 فروری کو موصول ہوا۔ 2 کروڑ روپے کا نوٹس آیا تھج، میں غریب آدمی ہوں، مجھے ڈر لگا، میں نے معاملے کی تحقیقات کے لیے ادھر ادھر بھاگ دوڑ کی۔ یہاں تک کہ میں نے ڈومریا گنج پولیس اسٹیشن میں درخواست بھی دی ہے۔
جب میں نوگڑھ گیا تو ڈپٹی کمشنر آف ٹیکسز نے بتایا کہ یہ میرے نام پر رجسٹرڈ ہے۔ تب سے میں ادھر ادھر بھاگ رہا ہوں۔ یہ نوٹس دہلی سے آیا ہے، میں ایک پرائیویٹ ٹیچر ہوں، میری تنخواہ 6 سے 7 ہزار روپے ہے، میں چاہتا ہوں اس پورے معاملے کی جانچ ہو، مجھے غیر ضروری طور پر پھنسایا جا رہا ہے۔
