مالدہ، 17 جنوری (یو این آئی) وزیر اعظم نریندر مودی نے ہفتہ کے روز ہاوڑہ سے گوہاٹی کے درمیان چلنے والی ملک کی پہلی وندے بھارت سلیپر ٹرین کو روانہ کیا اور کہا کہ ہندوستان کو جوڑنا ان کی حکومت کی اہم ترجیحات میں شامل ہے۔ 

ٹرین کو ہری جھنڈی دکھانے سے قبل وزیر اعظم نے یہاں طلبہ سے بات چیت بھی کی۔ اس دوران بعض طلبہ نے وزیر اعظم کو پینٹنگز بطور تحفہ پیش کی۔ وزیر اعظم نے ٹرین میں سنٹرل اسکول کے طلبہ سے گفتگو کی۔ اس موقع پر وزیر اعظم نے کہا کہ پہلے لوگ دیگر ملکوں کی جدید ٹرینوں کو دیکھ کر یہ امید کیا کرتے تھے کہ ہندوستان میں بھی ایسی ٹرینیں ہوں۔ اب وہ خواب حقیقت بن رہا ہے۔ انہوں نے کہا کہ ملک کی پہلی وندے بھارت سلیپر ٹرین ماں درگا اور ماں کاماکھیا کی سرزمین کو جوڑ رہی ہے۔ اس پر انہوں نے مغربی بنگال اور آسام کے عوام کو مبارکباد دی۔ 
پی ایم مودی نے کہا کہ ریلوے اس وقت ایک بڑی تبدیلی کے دور سے گزر رہی ہے۔ آج مغربی بنگال سمیت پورے ملک میں 150 سے زائد وندے بھارت ٹرینیں چل رہی ہیں۔ جدید اور تیز رفتار ٹرینوں کا ایک وسیع نیٹ ورک تیار ہو رہا ہے جس سے مغربی بنگال کے غریب اور متوسط طبقے کے خاندانوں کو فائدہ پہنچ رہا ہے۔ وزیر اعظم نے مغربی بنگال کو ملی مزید چار وندے بھارت ٹرینوں کا ذکر کرتے ہوئے کہا کہ جو لوگ ملک کے مختلف حصوں سے بنگال اور مشرقی ہندوستان کا سفر کرتے ہیں ان ٹرینوں سے ان کا سفر آسان ہوگا۔ 
انہوں نے کہا کہ آج انڈین ریلوے جدید ہونے کے ساتھ ساتھ خود کفیل بھی بنتی جا رہی ہے۔ ہندوستان کے تیار کردہ ریل انجن، کوچ اور میٹرو کوچ اب ہندوستانی ٹیکنالوجی کی شناخت بن رہے ہیں۔ آج ہندوستان امریکہ اور یورپ سے بھی زیادہ لوکوموٹیوز تیار کر رہا ہے۔ 
وزیر اعظم نے کہا کہ دنیا کے کئی ممالک مسافر کوچ اور میٹرو کوچ درآمد کر رہے ہیں جس سے معیشت کو فائدہ اور نوجوانوں کو روزگار مل رہا ہے۔ انہوں نے کہا کہ ہندوستان کو جوڑنا حکومت کی ترجیح ہے اور اس کا مظاہرہ آج کے اس پروگرام میں واضح طور پر نظر آتا ہے۔ 
یو این آئی۔ اے ایم۔ایف اے