نئی دہلی، 17 دسمبر (یواین آئی) روڈ ٹرانسپورٹ اور ہائی ویز کے وزیر نتن گڈکری نے بدھ کو پارلیمنٹ کو مطلع کیا کہ نیا ٹول ادائیگی نظام ملٹی لین فری فلو (ایم ایل ایف ایف) 2026 کے آخر تک ملک بھر میں لاگو کیا جائے گا۔ 

راجیہ سبھا میں وقفہ سوالات کے دوران ایک ضمنی سوال کا جواب دیتے ہوئے مسٹر گڈکری نے کہا کہ ایک بار نیا نظام لاگو ہونے کے بعد ٹول پلازوں پر عملے کی ضرورت نہیں رہے گی۔ گاڑیوں کے رجسٹریشن نمبرز کیمروں کے ذریعے کیپچر کیے جائیں گے، معلومات سیٹلائٹ کے ذریعے مرکزی نظام میں منتقل کی جائیں گی، اور رقم متعلقہ بینک اکاؤنٹ سے کاٹی جائے گی۔ اس سے گاڑیاں 80 کلومیٹر فی گھنٹہ کی رفتار سے سفر کر سکیں گی اور پھر بھی ٹول ادا کر سکیں گی۔ 
انہوں نے کہا کہ اس سے ایندھن میں 1,500 کروڑ روپے کی بچت ہوگی اور اس سے نیشنل ہائی وے اتھارٹی آف انڈیا (این ایچ اے آئی) کی آمدنی میں کم از کم 6,000 کروڑ روپے کا اضافہ متوقع ہے۔ انہوں نے ایوان کو بتایا کہ کچھ مقامات پر یہ نظام نافذ کیا گیا ہے۔ پہلے 10 کنٹریکٹ پہلے ہی دیے جا چکے ہیں اور 10 مزید پراسیس میں ہیں۔ اسے اگلے سال کے آخر تک ملک بھر میں قومی شاہراہوں پر نافذ کر دیا جائے گا۔ 

ایک اور ضمنی سوال کے جواب میں مسٹر گڈکری نے کہا کہ یہ افسوسناک ہے کہ منگل کو یمنا ایکسپریس وے پر ہونے والے حادثے میں ایمبولینس ایک گھنٹہ تاخیر سے پہنچی۔ انہوں نے مزید کہا کہ مرکزی حکومت ریاستی حکومتوں کو جدید ترین ایمبولینس فراہم کرنے کے منصوبے پر کام کر رہی ہے۔ ان کے آپریشن کی ذمہ دار ریاستی حکومتوں کی ہوں گی، صرف شرط یہ ہے کہ ایمبولینسیں حادثے کے 10 منٹ کے اندر جائے وقوعہ پر پہنچ جائیں۔