لکھنؤ/اعظم گڑھ، 23 جولائی (یو این آئی) سماجوادی پارٹی (ایس پی) کے سینئر رہنما اور اعظم گڑھ کی نظام آباد اسمبلی نشست سے پانچ مرتبہ رکن اسمبلی منتخب ہونے والے عالم بدی اعظمی کا بدھ کی دیر رات 90 برس کی عمر میں انتقال ہو گیا۔ وہ کافی عرصے سے علیل تھے اور گزشتہ کئی ماہ سے زیرِ علاج تھے۔

خاندانی ذرائع کے مطابق طبیعت زیادہ خراب ہونے پر انہیں اپریل میں لکھنؤ کے میدانتا اسپتال میں داخل کرایا گیا تھا۔ اس کے بعد مئی، جون اور جولائی کے دوران بھی ان کا علاج جاری رہا۔

عالم بدی اعظمی کی پیدائش 16 مارچ 1936 کو ضلع اعظم گڑھ میں ہوئی تھی۔ انہوں نے 1953 میں اسلامیہ کالج، گورکھپور سے انٹرمیڈیٹ اور 1956 میں گورکھپور کے ایک تکنیکی ادارے سے الیکٹریکل اور مکینیکل انجینئرنگ میں ڈپلومہ حاصل کیا تھا۔

انہوں نے 1996 میں پہلی مرتبہ نظام آباد اسمبلی حلقے سے انتخاب جیت کر اتر پردیش اسمبلی میں قدم رکھا، جس کے بعد وہ کئی بار اسی حلقے کی نمائندگی کرتے رہے۔ اپنے سیاسی کیریئر میں وہ مجموعی طور پر پانچ مرتبہ رکن اسمبلی منتخب ہوئے۔

ان کے انتقال پر سماجوادی پارٹی کے رہنماؤں اور کارکنوں نے گہرے رنج و غم کا اظہار کیا۔ اسمولی سے سماجوادی پارٹی کی رکن اسمبلی پنکی یادو نے کہا کہ عالم بدی اعظمی کی پوری زندگی سماجوادی نظریات، عوامی خدمت اور سماجی ہم آہنگی کے فروغ کے لیے وقف رہی۔