امریکی فوج نے مسلسل نویں رات ایران پر فضائی حملے کیے ہیں۔ امریکی صدر کی براہ راست ہدایت پر امریکی سینٹرل کمانڈ نے شام سات بجے ایک بار پھر ایران کے خلاف نیا اور بڑا فضائی حملہ کیا۔ امریکہ نے مسلسل نویں رات کو لڑاکا طیاروں اور میزائلوں کے ذریعہ ایران پر شدید بمباری کی ہے۔
امریکی سینٹرل کمانڈ نے واضح کیا ہے کہ ان حملوں کا واحد مقصد ہرمز میں تجارتی بحری جہازوں اور سویلین ملاحوں پر حملہ کرنے کی ایرانی فوجی صلاحیتوں کو مکمل طور پر تباہ کرنا ہے۔ اطلاعات کے مطابق امریکی حملوں میں شمال مغربی شہر تبریز سمیت متعدد علاقوں کو نشانہ بنایا گیا۔ ایرانی میڈیا نے تصدیق کی ہے کہ جنوبی صوبوں ہرمزگان اور بوشہر میں زور دار دھماکوں کی آوازیں سنی گئیں۔ ایران کی نیم سرکاری مہر نیوز ایجنسی کے مطابق جنوب مشرقی شہر چابہار میں بھی کئی دھماکے ہوئے جس کے بعد کونارک کے علاقے میں ایرانی فضائی دفاعی نظام کو فعال کر دیا گیا۔
نیوز پورٹل ’آج تک ‘ پر شائع خبر کے مطابق اس شدید گولہ باری کے درمیان، برطانوی فوج نے ایک انتہائی تشویشناک ان پٹ شیئر کیا ہے۔ برطانوی بحریہ کے مطابق عمان کے ساحل سے دور آبنائے ہرمز میں ایک بڑے تجارتی جہاز میں آگ لگ گئی ہے اور وہ شدید طور پر جل رہا ہے۔ تاہم آگ لگنے کی وجہ اور جہاز کی شناخت کے حوالے سے ابھی تک سرکاری معلومات جاری نہیں کی گئی ہیں۔ شبہ ہے کہ جہاز پر ایرانی یا امریکی حمایت یافتہ فورسز نے حملہ کیا تھا۔
دریں اثنا، علاقائی کشیدگی کی روشنی میں، بحرین کے دارالحکومت مناما میں امریکی سفارت خانے نے سیکورٹی الرٹ جاری کیا ہے۔ سفارت خانے نے کہا کہ اسے اطلاع ملی ہے کہ ایران وسطی مناما میں نامعلوم مقامات کو نشانہ بنانے کی کوشش کر سکتا ہے۔ امریکی شہریوں پر زور دیا گیا ہے کہ وہ چوکس رہیں اور مقامی حکام کی ہدایات پر عمل کریں۔
