کشی نگر، 11 جولائی (یواین آئی) اتر پردیش کے وزیر اعلیٰ یوگی آدتیہ ناتھ نے ہفتہ کو دعویٰ کیا کہ سماجوادی پارٹی (سپا) حکومت کے وقت ریاست میں ترقی کا تصور بھی نہیں کیا جا سکتا تھا جبکہ موجودہ حکومت کے دورِ اقتدار میں ریاست میں امن و امان اور ترقی کا نیا ماحول بنا ہے۔ وزیر اعلیٰ نے کشی نگر کے رام کولا اور ہاٹا اسمبلی حلقوں میں 525 کروڑ روپے کی لاگت والے 464 ترقیاتی منصوبوں کا افتتاح اور سنگ بنیاد رکھتے ہوئے اپوزیشن، بالخصوص سماجوادی پارٹی (ایس پی) پر شدید حملہ کیا۔ ٹیکواٹار میں منعقدہ جلسہ عام سے خطاب کرتے ہوئے وزیر اعلیٰ نے کہا کہ پہلی حکومتوں کے پاس نہ تو پالیسی تھی اور نہ ہی نیت۔ ان کی سوچ ہی ترقی مخالف تھی، ایسے میں ریاست کی ترقی کا تصور بھی نہیں کیا جا سکتا تھا۔ انہوں نے کہا کہ پہلے اتر پردیش میں تہواروں کے دوران دنگے اور کرفیو عام بات تھی، لیکن آج ریاست امن، سلامتی اور ترقی کی راہ پر آگے بڑھ رہی ہے۔ وزیر اعلیٰ نے کسی کا نام لیے بغیر کہا کہ مندروں پر قبضہ کرنے والے لوگ ایودھیا، کاشی اور متھرا کے بارے میں کیسے سوچ سکتے ہیں۔ دھرم اور عقیدے پر آج نصیحتیں کرنے والوں کو پہلے اپنا چہرہ دیکھنا چاہیے۔