بہار، مدھیہ پردیش اور گجرات کی 3 اسمبلی نشستوں پر ضمنی انتخابات کا اعلان، 30 جولائی کو ووٹنگ
الیکشن کمیشن آف انڈیا نے بہار، مدھیہ پردیش اور گجرات کی تین اسمبلی نشستوں پر ضمنی انتخابات کا اعلان کر دیا ہے۔ کمیشن کے مطابق بہار کی بانکی پور، مدھیہ پردیش کی دتیا اور گجرات کی مانجل پور اسمبلی نشستوں کے لیے 30 جولائی کو ووٹنگ ہوگی، جبکہ ووٹوں کی گنتی اور نتائج کا اعلان 3 اگست کو کیا جائے گا۔
الیکشن کمیشن کے جاری کردہ شیڈول کے مطابق 6 جولائی کو الیکشن نوٹیفکیشن جاری ہوگا۔ امیدوار 13 جولائی تک اپنے کاغذات نامزدگی داخل کر سکیں گے، 14 جولائی کو نامزدگیوں کی جانچ ہوگی جبکہ 16 جولائی امیدواروں کے لیے کاغذات نامزدگی واپس لینے کی آخری تاریخ مقرر کی گئی ہے۔
مدھیہ پردیش کی دتیہ اسمبلی نشست پر ضمنی انتخاب اس وقت ضروری ہوا جب وہاں سے کانگریس کے رکن اسمبلی راجندر بھارتی کو ایک جعلسازی کے مقدمے میں سزا سنائے جانے کے بعد نااہل قرار دے دیا گیا۔ انہوں نے 2023 کے اسمبلی انتخابات میں بھارتیہ جنتا پارٹی کے سینئر رہنما نروتم مشرا کو 7 ہزار سے زیادہ ووٹوں کے فرق سے شکست دی تھی۔ اس انتخاب میں راجندر بھارتی کو 88 ہزار 977 جبکہ نروتم مشرا کو 81 ہزار 235 ووٹ حاصل ہوئے تھے۔
گجرات کی مانجل پور اسمبلی نشست بھارتیہ جنتا پارٹی کے رکن اسمبلی یوگیش نارائن داس پٹیل کے انتقال کے باعث خالی ہوئی تھی۔ یوگیش پٹیل نے 2022 کے اسمبلی انتخابات میں بھارتیہ جنتا پارٹی کے ٹکٹ پر کامیابی حاصل کی تھی۔ گزشتہ ماہ 79 برس کی عمر میں ان کے انتقال کے بعد اس نشست پر ضمنی انتخاب کرایا جا رہا ہے۔
بہار کی بانکی پور اسمبلی نشست بھارتیہ جنتا پارٹی کے قومی صدر نتن نوین کے استعفے کے بعد خالی ہوئی۔ انہوں نے راجیہ سبھا کی رکنیت حاصل کرنے کے بعد اپنی اسمبلی رکنیت سے استعفیٰ دے دیا تھا، جس کے باعث اس حلقے میں بھی ضمنی انتخاب ناگزیر ہو گیا۔
الیکشن کمیشن آف انڈیا نے کہا ہے کہ تینوں اسمبلی حلقوں کے تمام پولنگ مراکز پر الیکٹرانک ووٹنگ مشین اور ووٹر ویری فائی ایبل پیپر آڈٹ ٹریل کا استعمال کیا جائے گا۔ کمیشن کے مطابق مطلوبہ تعداد میں تمام مشینیں دستیاب ہیں اور آزاد، منصفانہ اور پرامن پولنگ کو یقینی بنانے کے لیے ضروری انتظامات مکمل کر لیے گئے ہیں۔
