دہلی-این سی آر سمیت کئی ریاستوں میں آج پھر آندھی و بارش کا الرٹ، مغربی اضطراب اور مانسون فعال
ملک کے مختلف حصوں میں موسم کا مزاج ایک بار پھر تیزی سے بدلنے والا ہے۔ شمال مغربی ہندوستان میں سرگرم مغربی ہواؤں کے نظام (ویسٹرن ڈسٹربنس) اور تیزی سے آگے بڑھتے جنوب مغربی مانسون کے اثرات کے باعث شمالی، شمال مشرقی و جنوبی ہندوستان کی کئی ریاستوں میں آئندہ 3 سے 4 دنوں کے دوران آندھی، طوفان، گرج چمک اور بارش کا امکان ہے۔ اس سلسلے میں الرٹ بھی جاری کر دیا گیا ہے۔ راجستھان سمیت بعض ریاستوں میں گرد آلود آندھی چل سکتی ہے، جس سے معمولات زندگی اور آمد و رفت متاثر ہونے کا خدشہ ہے۔ تاہم موسم کی اس تبدیلی سے شدید گرمی سے راحت ملے گی۔
ہندوستانی محکمۂ موسمیات (آئی ایم ڈی) کے مطابق قومی راجدھانی دہلی اور اس کے آس پاس کے علاقوں میں 21 جون تک ہلکی سے درمیانی بارش، گرج چمک اور تیز ہواؤں کا سلسلہ جاری رہ سکتا ہے۔ بعض مقامات پر گرد آلود آندھی چلنے کا بھی امکان ہے۔ اگرچہ مانسون ابھی دہلی تک نہیں پہنچا ہے، لیکن قبل از مانسون سرگرمیاں مسلسل مضبوط ہو رہی ہیں۔ ہریانہ، پنجاب، جموں و کشمیر اور آس پاس کے علاقوں میں گرج چمک کے ساتھ تیز ہوائیں چلنے کی پیش گوئی کی گئی ہے۔
کئی مقامات پر ہوا کی رفتار 40 سے 50 کلومیٹر فی گھنٹہ تک پہنچ سکتی ہے۔ مغربی راجستھان میں موسم مزید شدید رہنے کا امکان ہے۔ یہاں گرد آلود آندھی کے ساتھ بعض اضلاع میں ہواؤں کی رفتار 80 کلومیٹر فی گھنٹہ تک پہنچ سکتی ہے۔ اس کے نتیجے میں سڑک اور فضائی ٹریفک متاثر ہونے کے ساتھ ساتھ حد نگاہ میں بھی کمی آ سکتی ہے۔
آئی ایم ڈی کے مطابق جنوب مغربی مانسون ملک کے اندر مسلسل پیش قدمی کر رہا ہے۔ اس کی شمالی حد اب مہاراشٹر، تلنگانہ، اڈیشہ، جھارکھنڈ اور بہار کے بعض حصوں تک پہنچ چکی ہے۔ آئندہ 4 دنوں کے دوران مہاراشٹر، کرناٹک، تلنگانہ، اڈیشہ، جھارکھنڈ، بہار اور چھتیس گڑھ کے مزید علاقوں میں مانسون پہنچ سکتا ہے۔ مانسون کی یہ پیش رفت خریف فصلوں کی بوائی کے اعتبار سے نہایت اہم سمجھی جا رہی ہے۔
