جے پور، 19 مئی (یو این آئی) راجستھان کے سابق وزیر اعلیٰ اشوک گہلوت نے کہا ہے کہ حکومت کو لوگوں کے سامنے پیٹرول اور ڈیزل کے بحران کے معاملے میں صورتحال واضح کرنی چاہیے، تاکہ عوام آنے والی پریشانی کے لیے تیار رہے۔
مسٹر گہلوت نے منگل کو ایک بیان میں کہا کہ پیر کو ان کی رہائش گاہ پر جودھپور سے ملنے آئے کئی لوگوں نے بتایا کہ وہاں پیٹرول پمپوں پر محدود مقدار میں ہی پیٹرول اور ڈیزل دیا جا رہا ہے اور کئی پیٹرول پمپوں پر ڈیزل اور پیٹرول دستیاب نہیں ہے۔ جودھپور سے جے پور تک آتے ہوئے تین چار بار پیٹرول اور ڈیزل بھروانا پڑ رہا ہے، کیونکہ ایک ہزار روپے سے زیادہ کا ایندھن نہیں دیا جا رہا ہے۔ ایل پی جی سلنڈر بھی کئی کئی دنوں تک نہیں مل رہے ہیں۔ انہوں نے کہا کہ حکومت کہہ رہی ہے کہ پیٹرول، ڈیزل اور ایل پی جی کی کوئی کمی نہیں ہے۔ پیٹرول پمپ مالکان سے اس کی معلومات لینے پر وہ بتا رہے ہیں کہ حکومت نے زبانی احکامات دے کر محدود مقدار میں پیٹرول اور ڈیزل دینے کے لیے کہا ہے۔ اس لیے پیٹرول پمپوں پر لمبی لائنیں لگ رہی ہیں۔
مسٹر گہلوت نے کہا کہ آج خبریں ہیں کہ جودھپور کے 40 فیصد پیٹرول پمپوں پر پیٹرول اور ڈیزل ختم ہو چکا ہے۔ یہ بحران کا وقت ہے، اس لیے حکومت کو عوام کے سامنے جھوٹ بولنے اور گمراہ کرنے کے بجائے سچ بتانا چاہیے، جس سے عوام آنے والی پریشانی کے لیے تیار رہے اور کوئی متبادل انتظام بھی ہو سکے۔ غیر مصدقہ اطلاعات سے افواہیں پھیلتی ہیں، جس سے عوام گمراہ ہوتی ہے اور افراتفری کی صورتحال پیدا ہوتی ہے۔