گجرات میں ایک بار پھر اسکولوں کو بم سے اڑانے کی دھمکی ملی ہے۔ اطلاعات کے مطابق ریاست کی راجدھانی احمد آباد اور وڈودرا کے17 اسکولوں کو بم سے اُڑانے کی دھمکیاں موصول ہوئی ہیں۔ ان سبھی اسکولوں کو ای میل کے ذریعہ بم سے اڑانے کی دھمکیاں دی گئی ہیں۔ ای میلز میں لکھا ہے کہ ’’گجرات خالصتان بنے گا اور ہندوستان کے ٹکڑے ٹکڑے ہوں گے‘‘۔ان دھمکی آمیز ای میلز کے بعد بڑے پیمانے پر کھلبلی مچ گئی ہے۔ پولیس تمام اسکولوں میں پہنچ گئی ہے اور سیکورٹی وجوہات کی بنا پر اسکول کے احاطے کی جانچ شروع کردی ہے۔ وڈودرا میں یہ واردات مرکزی وزیرداخلہ امت شاہ کے دورے کے ٹھیک بعد سامنے آئی ہے۔
دھمکی آمیز ای میلز ملنے کے بعد بم اسکواڈ ٹیم اور پولیس کی جانب سے اسکول کے تمام احاطے میں سخت تلاشی مہم شروع کردی گئی ہے۔ اسکول کے گوشہ گوشے کی تلاشی لی جا رہی ہے۔ پولیس نے تمام ضروری احتیاطی تدابیر اور حفاظتی اقدامات اختیار کئے ہیں۔ اس دوران اسکولوں میں حفاظتی انتظامات سخت کردیئے گئے ہیں اور معاملے کی تحقیقات کی جارہی ہیں۔
احمد آباد کے جن اسکولوں کو بم سے اُڑانے کی دھمکیاں ملی ہیں ان میں ڈی اے وی انٹرنیشنل اسکول، ایشیا اسکول، اے-ون اسکول، انکور انٹرنیشنل اسکول، سنت کبیر اسکول، سلور بیل اسکول اور ٹیولپ انٹرنیشنل اسکول شامل ہیں۔ وہیں دوسری طرف وڈودرا شہر اور ضلع کے 10 اسکولوں کو بھی دھمکیاں موصول ہوئی ہیں۔ ان میں ڈی آر امین (واسنا روڈ)، ارمی اسکول (سماسوالی روڈ)، نالندہ (واگھوڈیا روڈ)، بڑودہ ہائی اسکول (باغی خانہ)، نویگ انگلش میڈیم (سما)، جیون سادھنا (ناگرواڑہ)، ای ڈبلیو ایس (ڈبھوئی)، شانین (کھوڈیار نگر)، جی پی ایس (واگھوڈیا)، اور برائٹ ڈے (واسنا) شامل ہیں۔
اسکولوں کو موصول ہونے والی ای میل خالصتان دہشت گردوں کے نام سے بھیجی گئی ہے۔ اس سے قبل بھی احمد آباد اور وڈودرا کے اسکولوں کو اس طرح کے میل موصول ہو چکے ہیں۔ وڈودرا شہر کے پولس کمشنر نرسمہا کمار نے اسکولوں کی حفاظت کا حکم دیا ہے۔ پیر کو صبح سب سے پہلے 3 اسکولوں کو ای میل کے بارے میں معلومات ملی لیکن بعد میں یہ تعداد بڑھ کر 17 ہوگئی۔ جن اسکولوں کو دھمکیاں موصول ہوئی ہیں وہ شہر اور دیہی اضلاع میں واقع ہیں۔ میل میں دوپہر 1.11 بجے دھماکہ کرنے کی دھمکی دی گئی ہے۔ دھمکی ملنے پر انتظامیہ نے فوری طور پر اسکول بند کرکے پولیس کو اطلاع دی۔ وڈودرا شہر میں واقع ارمی اسکول کے ہاسٹل کو خالی کرا لیا گیا ہے۔ اسکولوں میں پولیس کے اعلیٰ افسران موجود ہیں۔