Jadid Khabar

کپل مشرا کے دفتر کے باہر پندرہ گولیاں چلانے والا گینگسٹر انکاؤنٹر میں مارا گیا

Thumb

نوئیڈا اسپیشل ٹاسک فورس (ایس ٹی ایف) اور دہلی پولیس کی مشترکہ ٹیم نے اتر پردیش کے بلند شہر میں ایک بڑا آپریشن کیا۔ نیوز پورٹل ’آج تک‘ پر شائع خبر کے مطابق دونوں ایجنسیوں کے مشترکہ آپریشن کے دوران مقابلے میں "ڈی کمپنی" سے وابستہ بدنام زمانہ گینگسٹر نسیم درانی مارا گیا۔ نسیم درانی انڈر ورلڈ ڈان چھوٹا شکیل سے بھی قریبی رابطے میں تھا۔ اطلاعات کے مطابق سال 16-17 کے دوران شکیل نے اسے تہاڑ جیل میں بند چھوٹا راجن کو مارنے کا ٹھیکہ بھی دیا تھا۔

پولیس کو کافی عرصے سے دہلی میں قتل کے ایک مقدمے میں مطلوب نسیم درانی کی تلاش تھی۔ بلند شہر میں نسیم اور پولیس ٹیم کے درمیان کئی راؤنڈ فائرنگ ہوئی۔ نسیم درانی کو متعدد گولیاں لگیں جس سے وہ شدید زخمی ہو گیا۔ پولیس ٹیم اسے فوری طور پر اسپتال لے گئی لیکن وہاں ڈاکٹروں نے جانچ کے بعد اسے مردہ قرار دے دیا۔
اطلاعات کے مطابق نسیم درانی نے 16 نومبر کو دہلی حکومت کے وزیر کپل مشرا کے دفتر کے باہر سمیر نامی شخص کو 15 سے 20 گولیاں مار کر بے دردی سے قتل کر دیا۔ نسیم کے خلاف قتل، اقدام قتل اور ڈکیتی سمیت 25 سے زائد سنگین جرائم کے مقدمات درج تھے۔ مزید برآں، نسیم درانی پر پاکستانی نژاد طارق فتح کے قتل کی منصوبہ بندی کا الزام تھا۔