چنڈی گڑھ، 28 جولائی (یو این آئی) محکمہ موسمیات نے پنجاب اور چنڈی گڑھ میں اگلے تین دنوں اور اگست کے پہلے ہفتے میں شدید بارش کا امکان ظاہر کیا ہے۔

محکمہ موسمیات نے منگل کو یہ معلومات دی۔ چنڈی گڑھ محکمہ موسمیات کے ڈائریکٹر سریندر پال نے بتایا کہ منگل، بدھ اور جمعرات کے ساتھ ساتھ اگست کے پہلے ہفتے میں چنڈی گڑھ کے قریبی علاقوں اور خاص طور پر پنجاب میں شدید بارش کے امکانات ہیں۔ محکمہ نے بتایا کہ ہماچل پردیش میں بھی اچھی بارش ہو سکتی ہے۔

انہوں نے کہا کہ یہ بارش کسانوں کے لیے راحت لائے گی۔ محکمہ موسمیات کے مطابق سال 2025 کے مقابلے 2026 میں اب تک کم بارش ریکارڈ کی گئی ہے۔ وہیں، جون سے ستمبر تک جاری رہنے والے پورے مانسون کے سیزن میں بھی اس سال معمول سے کم بارش کا تخمینہ لگایا گیا ہے۔

محکمہ موسمیات نے لوگوں کو تیز بہاؤ والے پانی، ندیوں اور برساتی نالوں کے قریب جانے سے گریز کرنے کا مشورہ دیا ہے۔ محکمہ کا کہنا ہے کہ ہماچل پردیش میں شدید بارش کا اثر نچلے علاقوں میں بھی دیکھنے کو ملتا ہے، جس سے پانی کی سطح بڑھ جاتی ہے اور حادثات کا خطرہ بڑھ جاتا ہے۔ حال ہی میں ایسے کئی حادثات پیش آئے ہیں۔ محکمہ نے لوگوں سے بیدار رہنے اور موسمی انتباہات پر عمل کرنے کی اپیل کی ہے۔