امریکہ نے ہندوستان اور 16 دیگر ممالک سے خریدی جانے والی اشیا پر 10 فیصد ٹیرف عائد کرنے کا اعلان کر دیا ہے۔ بتایا جاتا ہے کہ یہ قدم اٹھایا گیا کیونکہ ان اشیا کی تیاری میں جبریہ مزدوری کا استعمال کیا گیا تھا۔ امریکی تجارتی نمائندے جیمیسن گریر نے آج ٹریڈ ایکٹ کی دفعہ 301 کے تحت 60 ممالک پر نئے ٹیرف کا اعلان کیا۔ یہ اعلان تمام ممالک پر عائد 10 فیصد اضافی ٹیرف کی مدت ختم ہونے سے ایک دن پہلے کیا گیا ہے۔
’یو ایس ٹی آر‘ کے بیان میں کہا گیا ہے کہ گریر نے صدر ڈونالڈ ٹرمپ کی ہدایت پر 1974 کے ٹریڈ ایکٹ کی دفعہ 301 کے تحت 60 معیشتوں پر ٹیرف عائد کرنے کا آخری قدم اٹھایا ہے۔ ان ممالک نے جبریہ مزدوری سے تیار کردہ اشیا کی درآمد پر پابندی عائد کرنے اور اسے مؤثر طریقے سے نافذ کرنے میں ناکامی کا مظاہرہ کیا تھا۔
گریر نے یہاں ایک بیان میں کہا کہ یہ قدم انسانی حقوق کی خلاف ورزیوں اور تجارت کے غلط طریقوں کی اصلاح کی سمت میں ایک شروعات ہوگی، جس سے ہر جگہ مزدوروں کی فلاح و بہبود کو یقینی بنایا جا سکے گا۔ 10 فیصد ٹیرف کی شرح ہندوستان، کناڈا، برطانیہ، بنگلہ دیش اور پاکستان سمیت 17 ممالک پر نافذ ہوتی ہے۔ اس سے پہلے ہندوستان ان ممالک کے زمرے میں تھا جن پر 12.5 فیصد ٹیرف عائد کیا جاتا تھا۔
اس معاملے میں ایک وفاقی نوٹ میں اس بات پر توجہ مرکوز کی گئی کہ جون میں مجوزہ ٹیرف کے اعلان کے بعد ہندوستان نے جبریہ مزدوری سے تیار کردہ اشیا کی درآمد پر پابندی عائد کر دی تھی۔ 14 جون کو ہندوستان نے اپنی خارجہ تجارتی پالیسی میں تبدیلی کرتے ہوئے جبریہ مزدوری سے تیار کردہ اشیا کی درآمد پر پابندی لگا دی۔
ٹرمپ انتظامیہ نے یہ دونوں تحقیقات اس وقت شروع کی تھیں جب امریکی سپریم کورٹ نے فروری میں ہنگامی اختیارات کا استعمال کرتے ہوئے عائد کیے گئے گزشتہ سال کے باہمی ٹیرف کو غیر قانونی قرار دیا تھا۔ اس کے جواب میں انتظامیہ نے تمام ممالک پر 10 فیصد ٹیرف عائد کیا تھا، جس کی مدت آج ختم ہو رہی ہے۔
ہندوستان نے یو ایس ٹی آر کی جانب سے شروع کی گئی دونوں تحقیقات پر اعتراض ظاہر کیا ہے اور کہا ہے کہ ان معاملات پر اس دو طرفہ تجارتی معاہدے کے تحت بات چیت کی جا سکتی ہے، جس پر فی الحال مذاکرات جاری ہیں۔ امریکہ ہندوستان کا دوسرا سب سے بڑا تجارتی شراکت دار اور برآمدات کے لیے سب سے بڑی منڈی ہے۔ وزارت تجارت کے اعداد و شمار کے مطابق 2025 میں دونوں ممالک کے درمیان اشیا کی دو طرفہ تجارت تقریباً 141 ارب امریکی ڈالر کی تھی، جس میں ہندوستان کی برآمدات 87.3 ارب امریکی ڈالر تھیں۔
