فتح پور میں دوہرے قتل کے معاملے میں 14 مجرموں کو عمر قید
فتح پور، 19 جون (یو این آئی) اتر پردیش میں فتح پور ضلع کی ایک عدالت نے 2008 میں محرم کے دوران ہوئے دوہرے قتل کے معاملے میں 14 مجرموں کو عمر قید اور جرمانے کی سزا سنائی ہے۔
استغاثہ کے مطابق ہتھگام تھانہ حلقہ کے پٹی ساہ گاؤں میں 7 دسمبر 2008 کو محرم کے دوران ہوئے تنازعہ میں فائرنگ ہوئی تھی، جس میں دو لوگوں کی موت ہو گئی تھی۔ واقعہ کے بعد متوفین کے لواحقین نے 16 لوگوں کے خلاف نامزد مقدمہ درج کرایا تھا۔ معاملے کی تفتیش کے بعد پولیس نے عدالت میں چارج شیٹ داخل کی۔ سماعت کے دوران دو ملزمان کی موت ہو گئی، جبکہ بقیہ ملزمان کے خلاف مقدمہ کی کارروائی جاری رہی۔
ضلع اور سیشن عدالت نے ثبوتوں اور گواہوں کی بنیاد پر 14 ملزمان کو مجرم قرار دیتے ہوئے عمر قید کی سزا سنائی۔ ساتھ ہی 13 مجرموں پر 38-38 ہزار روپے اور ایک مجرم پر 43 ہزار روپے کا جرمانہ عائد کیا گیا۔ عدالت کے حکم کے بعد تمام مجرموں کو عدالتی تحویل میں لے کر جیل بھیج دیا گیا۔ تقریباً 17 برس پرانے اس انتہائی بحث طلب معاملے کے فیصلے پر عدالتی احاطے میں سکیورٹی کے خصوصی انتظامات کیے گئے تھے۔
