جے پور، 6 مئی (یو این آئی) راجستھان کے سابق وزیر اعلیٰ اور کانگریس رہنما  اشوک گہلوت نے کہا ہے کہ ریاست میں بی جے پی  کی حکومت کے کاموں کی حقیقت خود اسی جماعت کے اراکینِ اسمبلی بے نقاب کر رہے ہیں۔ 

انہوں نے بدھ کو جاری ایک بیان میں کہا کہ ادے پور کی جائزہ میٹنگ میں پرتاپ گمیتی (بی جے پی ایم ایل اے، گوگندا) کا یہ کہنا کہ "آنگن واڑی کے غذائی پیکٹ کو جانور بھی نہیں کھاتے" انتہائی تشویشناک ہے۔ 

گہلوت نے کہا کہ خاص طور پر قبائلی علاقوں میں بچوں اور حاملہ خواتین کی صحت کے ساتھ اس طرح کا کھلواڑ کسی صورت قابلِ برداشت نہیں۔ ایک طرف اسکیموں کے نفاذ میں تاخیر ہو رہی ہے اور دوسری طرف معصوم بچوں کے حصے کے کھانے میں بدعنوانی ہو رہی ہے۔ 

انہوں نے سوال اٹھایا کہ بی جے پی حکومت اشتہارات اور میٹنگز سے آگے بڑھ کر غریب بچوں کی فلاح پر کب توجہ دے گی، اور کیا اس بدعنوانی کی کبھی جانچ ہوگی یا قبائلیوں کے حقوق اسی طرح پامال ہوتے رہیں گے۔