کولکاتا، 04 مئی (یواین آئی) مغربی بنگال اسمبلی انتخابات کے ابتدائی رجحانات میں ترنمول کانگریس کے پیچھے رہنے کے دوران موجودہ وزیر اعلیٰ ممتا بنرجی نے پیر کے روز پارٹی امیدواروں اور کارکنوں سے حوصلہ نہ ہارنے کی اپیل کی ہے۔  
محترمہ بنرجی نے زور دے کر کہا کہ بھارتیہ جنتا پارٹی (بی جے پی) کے حق میں ابتدائی برتری کی توقع پہلے سے تھی اور حتمی نتائج ترنمول کانگریس کے حق میں ہی آئیں گے۔  
صبح سے دوپہر تقریباً 12:30 بجے تک کے رجحانات کے مطابق بی جے پی 190 سے زیادہ نشستوں پر آگے تھی، جبکہ ترنمول کانگریس 90 سے بھی کم حلقوں میں آگے چل رہی تھی۔  اس صورتحال کو دیکھتے ہوئے محترمہ بنرجی نے سوشل میڈیا پر ایک ویڈیو پیغام کے ذریعے پارٹی امیدواروں اور کاؤنٹنگ ایجنٹس سے رابطہ کیا اور انہیں گنتی کے مراکز پر ڈٹے رہنے اور محتاط رہنے کی ہدایت دی۔  
ترنمول سپریمو نے ووٹوں کی گنتی کے عمل کو متاثر کرنے کی کوششوں کا الزام لگاتے ہوئے کہا کہ براہ کرم یہ یقینی بنائیں کہ کوئی بھی امیدوار یا کاؤنٹنگ ایجنٹ گنتی کے مرکز کو نہ چھوڑے۔ یہ بی جے پی کی منصوبہ بندی کا حصہ ہے۔  محترمہ بنرجی نے دعویٰ کیا کہ انہیں ان ابتدائی رجحانات کا اندازہ پہلے سے تھا۔ انہوں نے کہا کہ بی جے پی کی برتری پہلے نظر آئے گی، جبکہ جیسے جیسے گنتی آگے بڑھے گی ترنمول کانگریس کے اعداد و شمار بعد میں سامنے آئیں گے۔  ترنمول رہنما نے ووٹوں کی گنتی کے عمل میں بے ضابطگیوں کا الزام لگاتے ہوئے کہا کہ کئی مقامات پر گنتی روک دی گئی ہے اور تضادات دیکھے گئے ہیں۔  محترمہ بنرجی نے مرکزی فورسز اور پولیس پر ڈرانے دھمکانے کا بھی الزام لگایا۔ انہوں نے کہا کہ ترنمول کانگریس کے دفاتر پر حملے کیے جا رہے ہیں اور ان پر زبردستی قبضہ کیا جا رہا ہے۔  ترنمول کانگریس کی سربراہ نے دعویٰ کیا کہ ان کی پارٹی درحقیقت 100 سے زیادہ نشستوں پر آگے ہے، لیکن یہ اعداد و شمار دکھائے نہیں جا رہے ہیں۔ انہوں نے الزام لگایا کہ الیکشن کمیشن مرکزی فورسز کی مدد سے من مانی کر رہا ہے اور ریاستی پولیس کو دباؤ میں کام کرنے پر مجبور کیا جا رہا ہے۔  پارٹی کارکنوں کا حوصلہ بڑھاتے ہوئے محترمہ بنرجی نے کہا کہ مایوس ہونے کی کوئی ضرورت نہیں ہے۔ انہوں نے صبر کرنے کی اپیل کرتے ہوئے کہا کہ ابھی صرف تین سے چار مرحلوں کی گنتی ہوئی ہے، جبکہ کل 18 سے 19 مرحلے ہونے ہیں۔ سورج غروب ہونے تک انتظار کریں-آپ ہی جیتیں گے۔  محترمہ بنرجی نے اعتماد ظاہر کرتے ہوئے کہا کہ پارٹی مضبوطی سے لڑائی جاری رکھے گی۔ فکر نہ کریں، ہم شیروں کی طرح لڑیں گے اور جیت حاصل کریں گے۔