اسلام آباد: پاکستان میں تپِ دق (ٹیوبر کلوسس، ٹی بی) ایک بار پھر سنگین عوامی صحت کے بحران کی صورت اختیار کرتا جا رہا ہے، جہاں روزانہ سینکڑوں افراد اس مہلک بیماری کا شکار ہو رہے ہیں۔ عالمی ادارہ صحت کی تازہ رپورٹ کے مطابق ملک میں روزانہ 1800 سے زائد نئے کیسز سامنے آتے ہیں، جبکہ تقریباً 140 افراد ہر دن اس بیماری کے باعث جان گنوا رہے ہیں، جو صورت حال کی سنگینی کو واضح کرتا ہے۔

عالمی ادارہ صحت کی جانب سے عالمی یومِ تپِ دق کے موقع پر جاری اعداد و شمار کے مطابق پاکستان میں ہر سال تقریباً 6 لاکھ 69 ہزار افراد تپِ دق سے متاثر ہوتے ہیں، جبکہ 51 ہزار کے قریب اموات ہوتی ہیں۔ یہ اعداد و شمار نہ صرف تشویشناک ہیں بلکہ اس امر کی نشاندہی بھی کرتے ہیں کہ ملک میں اس بیماری پر قابو پانے کی کوششیں ناکافی ثابت ہو رہی ہیں۔
ایک مقامی اخبار میں شائع اداریے کے مطابق پاکستان مشرقی بحیرہ روم کے خطے میں تپِ دق کے کل کیسز کا تقریباً 73 فیصد بوجھ اٹھا رہا ہے اور دنیا بھر میں اس بیماری کے حوالے سے پانچویں نمبر پر ہے۔ یہ صورت حال اس بات کی غماز ہے کہ عوامی صحت کے شعبے میں درپیش مسائل اب تک مؤثر انداز میں حل نہیں ہو سکے۔
رپورٹ میں یہ بھی بتایا گیا ہے کہ پاکستان میں ہر دس منٹ کے دوران ایک شخص تپِ دق کے باعث جان گنوا دیتا ہے، حالانکہ یہ ایک قابلِ علاج بیماری ہے۔ ماہرین کے مطابق بروقت تشخیص، معیاری ادویات کی دستیابی اور مریضوں کی مسلسل دیکھ بھال کے ذریعے ان اموات کو بڑی حد تک روکا جا سکتا ہے۔
تاہم فنڈز کی کمی، کمزور طبی ڈھانچہ اور ادویات کی قلت جیسے مسائل نے اس مرض کے خلاف جاری مہم کو شدید متاثر کیا ہے۔ خاص طور پر دیہی اور پسماندہ علاقوں میں صحت کی سہولیات کی عدم دستیابی نے صورتحال کو مزید پیچیدہ بنا دیا ہے۔
ماہرین کا کہنا ہے کہ تپِ دق زیادہ تر غریب اور کمزور طبقات کو متاثر کرتی ہے، اس لیے اس کے خاتمے کے لیے حکومت کو سنجیدہ اقدامات کرنا ہوں گے۔ اس میں صحت کے بجٹ میں اضافہ، عوامی آگاہی مہمات کا فروغ اور دور دراز علاقوں تک طبی سہولیات کی فراہمی شامل ہے۔ اگر فوری اور مؤثر حکمت عملی اختیار نہ کی گئی تو یہ بحران مزید شدت اختیار کر سکتا ہے۔