لکھنؤ، 9 اپریل (یو این آئی) سماج وادی پارٹی (ایس پی) کے صدر اکھلیش یادو نے بی جے پی حکومت کو نشانہ بناتے ہوئے الزام لگایا کہ حکومت جاتے جاتے ہر طرح سے عوام سے پیسے بٹورنے میں مصروف ہے۔
انہوں نے کہا کہ پہلے ٹریفک پولیس کے ذریعے بھتہ خوری کی جاتی تھی، اب اے آئی کے نام پر عوام کو لوٹنے کا نیا طریقہ وضع کیا گیا ہے۔ انہوں نے طنزیہ انداز میں کہا کہ بی جے پی کے لیے اے آئی کا مطلب "آمدنی" بن گیا ہے۔
مسٹر یادو نے جمعرات کو ایکس پر لکھا، "ٹریفک جام کے پیچھے بہت سی حقیقی وجوہات ہیں، جنہیں حکومت نظر انداز کر رہی ہے۔ اس کی وجہ سڑکوں کی خراب حالت، تنگ سڑکیں، ناقص ٹریفک سگنلز، ناکہ بندی، روٹ ڈائورژں، ون وے نظام کی کمی، پانی جمع ہونا، ڈیوائیڈرز کی خراب حالت، اور ٹریفک قوانین کی خلاف ورزی شامل ہیں۔ ٹریفک پولیس کے کام کے حالات بھی انتہائی خراب ہیں اور انہیں بنیادی سہولیات تک دستیاب نہیں ہیں۔ ڈرائیوروں پر وقت پر پہنچنے کا دباؤ، ذہنی تناؤ اور گاڑیوں کی ناقص فٹنس بھی حادثات اور ٹریفک جام کا باعث بن رہی ہے۔" 
ایس پی صدر نے الزام لگایا کہ چوراہوں پر ٹریفک پولیس کی موجودگی کم رہتی ہے، جبکہ آگے موڑ پر چھپ کر چالان کاٹنے کا رجحان بڑھ رہا ہے۔انہوں نے یہ بھی کہا کہ اب ڈیجیٹل ادائیگیوں کے ذریعے وصولی کا ایک نیا طریقہ اپنایا جا رہا ہے، جس سے احتساب اور شفافیت پر سوال اٹھ رہے ہیں۔
سی سی ٹی وی سسٹم پر سوال اٹھاتے ہوئے انہوں نے کہا کہ ریکارڈنگ اکثر صرف منتخب کیسز میں ہی دستیاب کرائی جاتی ہے جبکہ دیگر کیسز میں تکنیکی خرابیوں کا حوالہ دیا جاتا ہے۔ اکھلیش یادو نے کہا کہ عوام اب اس نظام سے تنگ آچکے ہیں اور بدعنوانی کے خلاف اپنی ناراضگی ظاہر کرنے کے لیے تیار ہیں۔