کانگریس رہنما کنہیا کمار نے بی جے پی پر سخت طنز کرتے ہوئے الزام عائد کیا ہے کہ ملک میں دانستہ طور پر نفرت کی سیاست کو فروغ دیا جا رہا ہے، جس کا مقصد صرف سیاسی فائدہ حاصل کرنا ہے۔ چھتیس گڑھ کے رائے پور میں صحافیوں سے گفتگو کرتے ہوئے انہوں نے کہا کہ نفرت کی سیاست سے ملک کو کوئی فائدہ نہیں ہوگا، بلکہ اس سے سماج میں تقسیم اور بداعتمادی بڑھے گی۔

کنہیا کمار نے کہا کہ آج مہاتما گاندھی کا یومِ شہادت ہے اور اس موقع پر پورا ملک اور دنیا انہیں یاد کر رہی ہے۔ انہوں نے کہا کہ گاندھی جی نے سچائی اور عدم تشدد کا جو راستہ دکھایا تھا، وہ آج بھی ملک کے لیے سب سے درست راستہ ہے۔ انہوں نے بتایا کہ سرگوجا میں کئی برسوں سے غیر سیاسی تنظیمیں مہاتما گاندھی کی یاد میں پروگرام منعقد کرتی آ رہی ہیں، جو سماجی ہم آہنگی کی علامت ہیں۔
انہوں نے الزام لگایا کہ کچھ لوگ جان بوجھ کر نفرت پھیلا رہے ہیں تاکہ ان کی سیاست چلتی رہے، لیکن اب عوام پہلے سے زیادہ باخبر اور باشعور ہو چکی ہے۔ اسی وجہ سے نفرت پر مبنی سیاست خطرے میں ہے اور زیادہ دیر تک کامیاب نہیں ہو سکتی۔ کنہیا کمار کے مطابق مہاتما گاندھی نے ہمیشہ تمام مذاہب کو ساتھ لے کر چلنے کی بات کی، مگر آج ملک میں مذہب کی بنیاد پر سیاست کو ہوا دی جا رہی ہے۔
کانگریس رہنما نے کہا کہ آج ملک میں ناتھورام گوڈسے جیسی سوچ کو سیاست میں جگہ دی جا رہی ہے، جو نہایت تشویش ناک ہے۔ ان کے مطابق ہمیں مہاتما گاندھی کو صرف سال میں ایک دن نہیں بلکہ روزانہ یاد کرنے کی ضرورت ہے، تاکہ نفرت کی سیاست کا خاتمہ ہو اور تمام مذاہب کے لوگ مل جل کر رہ سکیں۔
بی جے پی پر نشانہ سادھتے ہوئے انہوں نے کہا کہ بی جے پی کے رہنما بھی اسی ملک کے شہری ہیں اور انہیں ہندوستان کی تاریخ کا بخوبی علم ہے، اس کے باوجود وہ ایسی سیاست کر رہے ہیں جو ملک کو تقسیم کرتی ہے۔ انہوں نے اپیل کی کہ سچائی اور عدم تشدد کے راستے پر چل کر ہی ملک کی ترقی ممکن ہے۔