شیو سینا (یو بی ٹی) کے سربراہ ادھو ٹھاکرے نے بھارتیہ جنتا پارٹی (بی جے پی) پر لسانی اور مذہبی بنیاد پر ماحول خراب کرنے کا الزام لگاتے ہوئے کہا ہے کہ بی جے پی نے اپنے پرانے’ قوم پہلے‘ نظریہ کو ترک کرکے اب ’غنڈے اور چور پہلے‘ کا نعرہ اپنا لیا ہے۔
تھانے میں مہاراشٹر نونرمان سینا (ایم این ایس) کے سربراہ راج ٹھاکرے کے ساتھ ایک مشترکہ ریلی سے خطاب کرتے ہوئے ادھو ٹھاکرے نے کہا کہ وہ ’ پرانی بی جے مرچکی ہے‘ جو قومی مفاد کو سب سے اوپر رکھتی تھی۔ انہوں نے زور دے کر کہا کہ ممبئی اور تھانے کے اگلے میئر صرف مہاراشٹرین ہوں گے۔
اپنے حریف اور نائب وزیر اعلیٰ ایکناتھ شندے کو انہیں کے آبائی علاقے میں نشانہ بناتے ہوئے ادھو ٹھاکرے نے کہا کہ بی جے پی شندے کا ’استعمال کرو اور پھینکو‘ کی پالیسی اپنائے گی۔ انہوں نے کہا کہ ہم مودی یا بی جے پی کے نہیں بلکہ محب وطن اور مہاراشٹر کے بھگت ہیں۔ انہوں نے لوگوں سے شیو سینا (یوبی ٹی )۔ ایم این ایس اتحاد کو ووٹ دینے کی اپیل کرتے ہوئے کہا کہ یہ انتخاب زندگی کی سمت طے کرنے والا ہے۔
ادھو ٹھاکرے نے موجودہ ریاستی حکومت کو اب تک کی سب سے ’بے شرم حکومت‘ قرار دیتے ہوئے کہا کہ آلودگی اور بدانتظامی کی وجہ سے ممبئی اور تھانے کچرے کے ڈھیر میں تبدیل ہوگئے ہیں۔ اس سے پہلے راج ٹھاکرے نے صنعتکار گوتم اڈانی اور مرکزی حکومت کو نشانہ بناتے ہوئے الزام لگایا کہ اڈانی گروپ نے ملک کے ہوائی اڈوں اور بندرگاہوں پر ’بندوق کی نوک‘ پر قبضہ کیا ہے۔
بی جے پی کے ذریعہ اڈانی کے ساتھ ان کی تصویر شیئر کرنے پر پلٹ وار کرتے ہوئے راج نے کہا کہ میرے گھر رتن ٹاٹا اور مکیش امبانی بھی آئے ہیں لیکن اس کا مطلب یہ نہیں کہ میں کسی کے گناہوں کی پردہ پوشی کروں گا۔ جب ممبئی اور تھانے خطرے میں ہوں گے تو میں دوستی کی پرواہ نہیں کروں گا۔ راج ٹھاکرے نے الزام لگایا کہ بی جے پی ممبئی اور اس کے پڑوسی شہروں کو گجرات سے جوڑنا چاہتی ہے۔
انہوں نے گجراتی برادری سے بھی اس ’سازش‘کی مخالفت کرنے کی اپیل کی۔ راج نے کہا کہ ہم دوسری زبانوں کے خلاف نہیں ہیں لیکن اگر ہمیں اپنے ہی گھر میں ڈرایا گیا تو ہم اسے برداشت نہیں کریں گے۔ دونوں بھائیوں نے ایکناتھ شندے اور بی جے پی پر انتخابات میں پیسے کے دم پر مخالفین کو خریدنے کا الزام لگایا۔
