مہاراشٹر کے بھیونڈی واقع ایک لوم فیکٹری میں سلنڈر پھٹنے سے بھیانک آگ لگ گئی جس میں آگ بجھانے کی کوشش کے دوران فائر فائٹر زخمی ہوگیا۔ یہ واردات بدھ کے روزعلی الصبح مہاراشٹر کے بھیونڈی شہر کے قریب کھونی گاؤں کے سدھارتھ نگرعلاقے میں ہوئی جہاں اچانک آگ بھڑک اٹھی اور دیکھتے ہی دیکھتے اس نے خوفناک شکل اختیار کرلی۔ آگ کی زد میں آکر پوری لوم فیکٹری جل کر خاک ہوگئی جب کہ قریب ہی واقع 3 دیگر لوم فیکٹریاں بھی تباہ ہوگئیں۔ عینی شاہدین کے مطابق فیکٹری میں رکھے لوم، مشینری اور کپڑے کا بڑا ذخیرہ مکمل طور پر تباہ ہو گیا۔

آگ بجھانے کی کوشش کے دوران فیکٹری میں رکھا بڑا سلنڈر اچانک پھٹ گیا جس سے جائے وقوعہ پر افراتفری مچ گئی۔ اس سلنڈر دھماکے میں فائر فائٹر کانتی لال گجر زخمی ہو گئے۔ انہیں فوری طور پر علاج کے لیے اسپتال میں داخل کرایا گیا، جہاں ان کی حالت مستحکم بتائی جاتی ہے۔ اطلاع ملتے ہی فائر بریگیڈ کی دو گاڑیاں جائے وقوعہ پر پہنچیں اور جنگی بنیادوں پر آگ پر قابو پانے کی کوششیں شروع کردی گئیں۔ دھماکے کی وجہ سے آگ بجھانے کا کام کچھ دیر کے لیے مشکل ہوگیا تھا حالانکہ فائر بریگیڈ اہلکاروں نے تقریباً 2 گھنٹے کی مشقت کے بعد آگ پر قابو پالیا۔
جائے وقوعہ پر موجود مقامی لوگوں نے بتایا کہ انہوں نے صبح تقریباً 5:30 بجے اچانک آگ کے شعلے بلند ہوتے دیکھے۔ آئی اے این ایس کو دیئے بیان میں ایک مقامی رہائشی نے بتایا کہ کھڑکی کھولتے ہی آگ دکھائی دی جس کے بعد سبھی نیچے کی طرف بھاگے۔ ابتدائی طور پرایمبولینس جائے وقوعہ پرنہیں پہنچی اور تقریباً 20 سے 25 منٹ بعد ایمبولینس پہنچی۔