میکسیکو سٹی کے شمال مغربی علاقے میں پیر کو ایک بڑا حادثہ ہوا۔ کراسنگ پر ایک مال گاڑی نے ڈبل ڈیکر بس کو ٹکر مار دی جس سے کم سے کم 10 افراد کی موت اور 61 زخمی ہو گئے۔ یہ حادثہ میکسیکو سٹی سے قریب 80 میل (130 کلومیٹر) دور ایٹلاکو مُلکو قصبہ کے ایک صنعتی علاقے میں پیش آیا، یہاں پر گودام اور فیکٹریاں ہیں۔

میکسیکو کی سول ڈیفنس ایجنسی نے سوشل میڈیا پلیٹ فارم ’ایکس‘ پر بتایا کہ افسران جائے حادثہ پر راحت و بچاؤ کام میں لگے ہوئے ہیں۔ وہیں اسٹیٹ پروزکیوٹر کے دفتر نے اس معاملے کی جانچ شروع کر دی ہے۔ بس ’ہیرا دُورا ڈے پلاٹا‘ نامی بس لائن کی تھی جو ٹکر کے بعد پوری طرح سے تباہ ہو گئی۔ ایجنسی نے تصدیق کی ہے کہ حادثے میں 10 لوگوں کی جان گئی ہے جبکہ 61 زخمی ہوئے ہیں۔
بس کمپنی نے حادثے پر کچھ بھی کہنے سے صاف انکار کر دیا ہے۔ وہیں ٹرین لائن اور کینیڈین پیسفک کنساس سٹی آف میسیکو نے حادثے کی تصدیق کرتے ہوئے مہلوکین کو خراج عقیدت پیش کیا ہے۔
افسروں نے حادثے سے جڑی تفصیلات ساجھا نہیں کی ہے لیکن سوشل میڈیا پر ایک ویڈیو تیزی سے وائرل ہو رہا ہے جس میں دیکھا جا سکتا ہے کہ ریلوے کراسنگ کے پاس بھاری ٹریفک لگا ہوا تھا۔ سبھی ریلوے ٹریک پار کر رہے تھے، بس بھی رفتہ رفتہ ٹریفک سے نکل رہی تھی اور جیسے ہی بیچ ٹریک پر پہنچی، تبھی ایک تیز رفتار ٹرین آئی اور بس کو روندتے ہوئے موقع سے گزر گئی۔
مقامی میڈیا رپورٹس کے مطابق زخمیوں کو ریاست کے الگ الگ اسپتالوں میں داخل کرایا گیا ہے۔ افسروں نے فوری طور پر یہ نہیں بتایا کہ یہ حادثہ کیسے ہوا۔ میکسیکو کی ریل ٹرانسپورٹ ریگولیٹری ایجنسی کی حالیہ رپورٹ کے مطابق لیول کراسنگ پر ہونے والے حادثے سب سے عام ہیں اور حالیہ برسوں میں ان کی تعداد بڑھی ہے۔ گزشتہ سال ایسے 800 حادثے ہوئے جبکہ 2020 میں یہ تعداد 602 تھی۔ حالانکہ رپورٹ میں ان حادثوں میں مرنے والوں کی تعداد کا ذکر نہیں کیا گیا ہے۔