نئی دہلی: ہندوستان کی سرحدی فورسز نے جمعرات کی رات جموں و کشمیر کے ضلع سانبہ میں بین الاقوامی سرحد پر دراندازی کی ایک بڑی کوشش کو ناکام بنا دیا۔ یہ کارروائی ’آپریشن سندور‘ کے بعد کے حفاظتی اقدامات کا حصہ ہے، جس کے تحت پاکستانی حملوں کا مؤثر جواب دیا جا رہا ہے۔

بارڈر سکیورٹی فورس (بی ایس ایف) کے جموں ونگ نے سوشل میڈیا پلیٹ فارم ’ایکس‘ پر تصدیق کی کہ 8 مئی 2025 کی رات تقریباً 11 بجے سانبہ سیکٹر میں مشتبہ سرگرمی دیکھی گئی، جس پر بی ایس ایف کے اہلکاروں نے فوری کارروائی کرتے ہوئے دراندازی کی کوشش کو ناکام بنایا۔
دوسری جانب، وزارت دفاع نے بھی تصدیق کی ہے کہ جموں، پٹھان کوٹ اور ادھم پور میں فوجی ٹھکانوں کو پاکستانی ڈرون اور میزائل حملوں کا نشانہ بنایا گیا، جنہیں وقت پر ردعمل دے کر ناکام بنا دیا گیا۔ وزارت دفاع نے ’ایکس‘ پر بیان میں کہا، ’’قائم شدہ ایس او پیز کے تحت دستیاب حرکی و جامد صلاحیتوں کا استعمال کر کے ان خطرات کو مؤثر طریقے سے بے اثر کیا گیا۔ کسی بھی جانی یا مالی نقصان کی اطلاع نہیں ہے۔‘‘
وزارت نے مزید کہا کہ ہندوستان اپنی خودمختاری کے تحفظ اور عوام کی سلامتی کے لیے مکمل طور پر تیار ہے۔ ’آپریشن سندور‘ کے بعد ہندوستان نے دفاعی سطح پر نہ صرف اندرونی مستعدی بڑھا دی ہے بلکہ سفارتی محاذ پر بھی سرگرم ہو گیا ہے۔ وزیر خارجہ ایس جے شنکر نے امریکہ، اٹلی اور یورپی یونین کے رہنماؤں سے رابطہ کیا اور پاکستان کے اشتعال انگیز اقدامات پر سخت پیغام دیا۔
امریکی وزیر خارجہ مارکو روبیو سے گفتگو کے دوران جے شنکر نے سرحد پار دہشت گردی کے خلاف ہندوستان کے ردعمل پر زور دیا۔ انہوں نے گفتگو کے بعد ایکس پر کہا، ’’ہندوستان نے سرحد پار دہشت گردی کے خلاف توازن کے ساتھ مؤثر کارروائی کی ہے اور کسی بھی قسم کے تنازع کو بڑھانے کی کوششوں کا سختی سے جواب دیا جائے گا۔‘‘
امریکی محکمہ خارجہ نے اپنے بیان میں کہا، ’’سیکریٹری نے پہلگام میں ہونے والے دہشت گرد حملے پر افسوس کا اظہار کیا اور انسداد دہشت گردی میں ہندوستان کے ساتھ قریبی تعاون کی یقین دہانی کرائی۔‘‘
وزیر خارجہ نے اطالوی نائب وزیراعظم و وزیر خارجہ انتونیو تاجانی اور یورپی کمیشن کی نائب صدر کایا کالاس سے بھی بات کی۔ بات چیت کے دوران دہشت گردی کے خلاف مشترکہ مؤقف اور پاکستان کی کسی بھی اشتعال انگیزی پر سخت ردعمل پر تبادلہ خیال کیا گیا۔
یہ تمام پیش رفتیں پاکستان کی جانب سے حالیہ دنوں میں کئے گئے میزائل، ڈرون اور فائرنگ کے حملوں کے بعد سامنے آئی ہیں۔ ہندوستان نے نہ صرف عسکری سطح پر مستحکم جواب دیا بلکہ عالمی سطح پر پاکستان کو بے نقاب کرنے کی کوششیں بھی تیز کر دی ہیں۔